Atyraý bıligi kóshedegi keptelispen kúresti bastady

ATYRAÝ. QazAqparat - Atyraý qalasynyń ákimi Alımuhammed Quttumuratuly qarbalas sátterde avtomobıl keptelisin tártipke keltirýdi tapsyrdy, dep habarlaıdy QazAqparat tilshisi. 

Alımuhammed Quttumuratuly oblys ortalyǵynyń birneshe yqsham aýdanyn tekserip, qaramaǵyndaǵylarǵa qozǵalysy kóp jol qıylystaryn retke keltirý, qala ortalyǵyndaǵy qoqys jáne qurylys qaldyqtary problemasyn sheshý, sondaı-aq turǵyn úılerdiń qasbetterindegi aqaýlardy joıý jáne jol jıegindegi ıesiz jer ýchaskelerin kóriktendirý máseleleri boıynsha birqatar naqty tapsyrmalar berdi.

Qalany aralaý barysynda qala ákimi qaladaǵy avtomobıl joldarynda kóliktiń óte kóptigin atap kórsetip, qaramaǵyndaǵylarǵa qalanyń qozǵalysy kóp jol qıylystaryndaǵy qoldanystaǵy oń burylystardy keńeıtý jáne jańalaryn salý jobasyn ázirleýdi tapsyrdy.

Birinshi kezekte Baımuhanov-Berǵalıev, Beıbarys-Amandosov, Beıbarys-Qurmanǵazy, Taımanov-Bıgeldınov, Vladımırskıı-Ǵumarov kósheleriniń qıylystary belgilendi.

Atalǵan kóshe qıylystarynyń birqatarynda burylystar bar, alaıda olardyń ensiz bolýynan avtokólik ıeleriniń jolda manevr jasaýy problema týǵyzady.

 «Oblys ákimi oblys ortalyǵyndaǵy joldarda qarbalas sátterde avtokólik keptelisin barynsha retke keltirýdi tapsyrdy. Birinshi kezektegi mindet - kóligi qarbalas, úlken jol qıylystaryndaǵy qozǵalysty jeńildetý. Aǵymdaǵy jyldyń sońyna deıin biz osy problemany sheshýge tıispiz», - dedi qaramaǵyndaǵylarǵa Alımuhammed Quttumuratuly.

Sonymen qatar, qala ortalyǵynda jatqan qurylys qoqystary men jeke ýchaske qorshaýlarynyń, turǵyn úı qasbetteriniń jáne jaýyndy kúnderi adam óte almaıtyn balshyqqa aınalatyn jol jıekterindegi ıesiz jer ýchaskeleriniń kózge qorash jaı-kúıi qala basshysynyń renishin týǵyzdy.

«Qala turǵyndaryn tazalyq saqtaý mádenıetine ádettendirgen jón. Birinshi kezekte qalany tazalaıtyn kommýnaldyq qyzmetterdiń jumysyn kúsheıtý kerek, sońǵy ýaqytta turǵyndar bizdiń atymyzǵa kóptegen renishter bildirip jatady. Ekinshiden  kásipkerlerdi ózderiniń irgeles aýmaqtaryn kóriktendirýge, ýchaskelerindegi eski, qısaıǵan qorshaýlardy, qurylys qoqystaryn, aram shópterdi joıýǵa daǵdylandyrý qajet. Úshinshiden  turǵyn úılerdiń qasbetterin jaqsartý jáne jol jıegin sándi, estetıkalyq kelbetke keltirý qajet. Osynyń barlyǵyn biz aǵymdaǵy jyldyń sońyna deıin sheshýge tıispiz», - dep tapsyrma berdi shahar basshysy Alımuhammed Quttumuratuly.  

Sonymen birge qala ákimi Geolog aýyldyq okrýgindegi apatty jaǵdaıda turǵan jataqhananyń jaı-kúıimen tanysyp, turǵyndarmen áńgimelesti.