Atyraý balyqshylaryna arnalǵan kilem Qaznetti kúlkige batyrdy

ASTANA. QazAqparat - Atyraýdaǵy balyqshylarǵa arnalyp muz ústine tóselgen kilem men dóńgelek oıyǵy bar shatyr áleýmettik jeli qoldanýshylaryn kúlkige qaryq qyldy. Vıdeo Facebook-te jarııalanǵan, dep habarlaıdy mgorod.kz.

Áýesqoılar túsirgen taspada muz astynan balyq aýlaý pafos pen maqtanshaqtyqqa toly iske aınaldy. Endi atyraýlyq aǵalar edeni dóńgelektelip tesilgen shatyr men muz qatqan ózenniń ústine kilem tósep, mádenıetti túrde balyq aýlaıtyn bolady.

«Ádemi ómir súrýge eshkim shek qoıa almaıdy», - dep pikir bildirdi jeli qoldanýshylary. Vıdeo avtorynyń bildirgen pikirine qaraǵanda, osy shatyrlarda «vıskı-shık» uıymdastyrylady eken. Vıdeoda balyq aýlaýǵa daıyndyq úderisi túsirilgen sekildi. Qatysýshylardyń ózderi joq, biraq olardyń kelýlerine barlyǵy daıyn tur. Kadrda er kisi paıda bolady. Alaıda ol bedeli joǵary qonaqtarǵa arnalǵandaı kilemniń ústimen júrmeıdi.