Atyraý balyqshylary 200 keli tartatyn alyp qortpa aýlady

ATYRAÝ. QazAqparat – Atyraý balyqshylarynyń aýyna bekire tuqymdasyna jatatyn alyp qortpa tústi, dep habarlaıdy QazAqparat tilshisi.

Balyq sharýashylyǵy komıtetiniń resmı ókili Aslan Jeńisulynyń aıtýynsha, baǵaly balyq búgin Jaıyq ózeniniń «Kishi Damby» tartymynda aýlanǵan.

«Memlekettik tapsyrysty oryndaý maqsatynda 19 sáýirde «Amangeldi atyndaǵy» JShS-niń balyqshylar brıgadasy Jaıyq ózenindegi «Kishi Damby» tartymynan alyp qortpany aýlady. Baǵaly balyqty aýlaýǵa «Jaıyq-Atyraý bekire balyq ósirý zaýyty» RMQK-niń qyzmetkerleri de qatysty. Sý marjanynyń salmaǵy shamamen 200 kelige jýyq. Qazir alyp qortpa bekire balyqtaryn ósirý zaýytyna jetkizildi», - dedi Aslan Jeńisuly.

Eske sala ketelik, buǵan deıin Atyraýda úsh kólikten 100 keliden astam bekire tuqymdas balyq tabylǵanyn jazǵan edik.