Atyraý avtobýstarynda erikti baqylaýshylar men qupııa revızorlar júredi
ATYRAÝ. QazAqparat - Atyraý avtobýstarynda erikti baqylaýshylar men qupııa revızorlar tekseris júrgizedi, dep habarlaıdy QazAqparat tilshisi.
«11 qazannan bastap qoǵamdyq kólikte júrýdiń dıfferentsııalanǵan tarıfi engiziledi. Jumadan bastap Atyraý turǵyndary qolma-qol aqshamen 150 teńge, qolma-qol aqshasyz – 80 teńge tóleıdi. Bul jolaýshy tasymalyn móldir etip, kóleńkeli aqsha aınalymyn joıýǵa septigin tıgizedi. Osyǵan baılanysty, «Smart Qala» JShS ókilderi volonter retinde qoǵamdyq kólikke jańa tólem júıesin sátti engizýge kómektespek», - dep málimdedi Atyraý qalasynyń ákimdigi.
Qupııa revızor bolyp qoǵamdyq kóliktegi tólem júıesin tekseremin degen turǵyndarǵa – esik ashyq.
«Bıletti qalaǵan kezde tekserýge bolady. Tártip buzylǵan jaǵdaıdy sýretke nemese vıdeoǵa túsirip alýǵa bolady. Tipti jolaýshylardyń bılet alýyn syrttaı baqylap júre berýge de bolady», - deıdi «Smart Qala» JShS ókilderi.
Baqylaýshy bolamyn degenderge tıisti kýálik jáne avtobýsta tegin júrý quqyǵy beriledi. Tekseris jumystarynyń qorytyndylary BAQ jáne áleýmettik jelide jarııalanyp otyrady.
