Atyraý avtobýstarynda elektrondy bılet júıesi engiziledi
Bul joba tabys kózin kóleńkeli aınalymnan shyǵarý jáne áleýmettik mańyzy bar baǵyttardaǵy tasymaldaýshylardy sýbsıdııalaýǵa, qoǵamdyq kóliktegi naqty jolaýshylar aǵynyn anyqtaýǵa múmkindik beredi.
Aǵymdaǵy jyldyń 27 shildesi kúni Atyraý ákimdigi elektrondyq bıletteý júıesin engizý jónindegi operator «SMART-JKH» JShS-men jáne jolaýshy tasymaldaýshy 6 mekememen úshjaqty kelisim-shartqa qol qoıdy.
Qoǵamdyq kólikte elektrondy bılet engizý pılottyq jobasy jolaýshylar kóliginiń ekonomıkalyq tıimdiligin arttyrý, krımınogendik jaǵdaıdy jaqsartý, jergilikti bıýdjetke qosymsha salyq túsimderin arttyrý jáne kórsetiletin qyzmetterdiń sanyn baqylaýdy kúsheıtýge múmkindik beredi.
Atyraý qalasy ákiminiń orynbasary Meıirim Qalaýı atalǵan jobanyń «Tsıfrlyq Qazaqstan» baǵdarlamasy sheńberinde iske asyrylatynyn habarlady.
«Joba qyrkúıek aıynda pılottyq rejımde iske asyryla bastaıdy. Atyraý qalasy ákimdigi jáne «ATYRAÝ» ÁKK jergilikti fılıalynyń qoldaýymen qaladaǵy kólik tapshylyǵyn joıý maqsatynda jańadan 35 jolaýshy tasymaldaý kóligin alý josparlanyp otyr. Jańa qoǵamdyq kólikter «SMART JKH» JShS elektrondyq bıletteý júıesimen qamtylady», - deıdi M.Qalaýı.