Atyraý aýrýhanalarynda bir kúnde kóz jumǵan eki júkti áıel óliminiń sebebi aıtyldy
Buǵan deıin Atyraýda bir kúnde eki júkti áıel aýrýhanada qaıtys bolǵanyn jazǵan edik.
Eki júkti áıeldiń ólimi 12 qazanda tirkelgen. Ekeýi de – Maqat aýdanynyń turǵyndary. Onyń biri oblystyq aýrýhanada, ekinshisi Maqat aýdandyq ortalyq aýrýhanasynda kóz jumǵan.
Oblystyq aýrýhanasynda qaıtys bolǵan 33 jastaǵy áıel júktiliktiń 17-aptasynda bolǵan. Bul onyń úshinshi júktiligi eken. Ol Maqat aýdandyq ortalyq aýrýhanasynda baqylaýǵa alynǵan. Bıylǵy mamyr aıynan menıngıoma dıagnozy qoıylyp, nevropatologtiń esebinde turǵan. Onyń aýrýy bir jyl buryn bastalǵan. Mamyr aıynda MRT tekserýinen ótken. Sońǵy aptada bas aýrýy údep, júrek aınýy jıilegen. Ótken jeksenbide, 9 qazanda Atyraý oblystyq aýrýhanasynyń neırohırýrgııalyq bólimshesine mı qabyǵynyń ústindegi mıdyń qatersiz isigi dıagnozymen túsken. Ony aýrýhanaǵa qabyldaý kezinde bas aýrýy, aınalýy, júrek aınýy, este saqtaý qabiletiniń tómendeýi, kórý qabiletiniń nasharlaýy, jalpy álsizdik týraly shaǵym aıtqan», -dep habarlady oblystyq densaýlyq saqtaý basqarmasynyń baspasóz qyzmeti.
Aýrýhanada júkti áıelge zerthanalyq-dıagnostıkalyq jáne aspaptyq zertteýler júrgizilip, mamandardyń keńesi berilgen. Tıisti emdeý taǵaıyndalǵan.
«Eki kúnnen keıin, 11 qazanda jaǵdaıdyń nasharlaýyna baılanysty naýqas qarqyndy terapııa bólimine aýystyryldy. Mehanıkalyq jeldetý apparatyna qosyldy. Alaıda, dárigerlerdiń emdeý sharalaryna qaramastan, naýqas 12 qazanda qaıtys boldy. Aldyn ala sepsıs, septıtsemııa, sol jaq joǵarǵy pnevmonııasy, mıdyń mańdaı-parıetaldy bóliginde kólemdi isiktiń túzilýi, kóp organnyń jetkiliksizdigi, septıkalyq kúızelis dıagnozy qoıyldy», -dep naqtylady baspasóz qyzmeti.
Ekinshi júkti áıeldiń júregi Maqat aýdandyq ortalyq aýrýhanasynda toqtaǵan.
«Aýdandyq aýrýhananyń qabyldaý bólmesine júktiliktiń 32-aptasynda pnevmonııa dıagnozy qoıylǵan 34 jastaǵy áıel shuǵyl túrde jetkizildi. Ol da úshinshi balasyna júkti bolǵan. Júkti áıel dereý mehanıkalyq jeldetý apparatyna qosyldy. Birneshe saǵat ishinde onyń júregi úsh ret toqtady. Dárigerler onyń júrek soǵýyn qalpyna keltirdi. Alaıda, barlyq reanımatsııalyq sharaǵa qaramastan, naýqas keshki mezgilde qaıtys boldy. Naýqasqa vırýstyq-bakterııalyq genezıs sepsısi, septıkalyq kúızelis, oń jaq tómengi pnevmonııasy, reaktıvti gepatıt, baýyr men búırek jetkiliksizdigi, uryqtyń antenataldy ólimi dıagnozy qoıyldy», -dep málim etti basqarmanyń baspasóz qyzmetinen.
Júkti áıelder óliminiń túpkilikti sebepter qyzmettik tekserý, patalogoanatomııalyq zertteý nátıjelerinen keıin naqtylanady. Infektsııanyń qozdyrǵyshyn anyqtaý úshin vırýsologııalyq jáne bakterıologııalyq zertteýlerge synamalar alynǵan. Maqat aýdanyndaǵy epıdemıologııalyq jaǵdaıdy zertteý qajettigi týyndap otyr.