Atyraý áýejaıynda quqyq buzǵan 30-dan astam júrgizýshi ustaldy

ATYRAÝ. QazAqparat – Atyraýda H.Dospanova atyndaǵy halyqaralyq áýejaı turaǵynda quqyq buzýshylyq jasaǵan 30-dan astam júrgizýshi ustaldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, áýejaıdaǵy kólik turaǵy jastardyń túngi mezgilde jıi jınalatyn orynǵa aınalǵan.

«Jas júrgizýshiler qaýipti manevrler jasaý, asfalt jabynyn búldirý, kólik quralynyń konstrýktsııasyna sáıkes kelmeıtin syrtqy jaryqtandyrý aspaptaryn qoldaný, kólik quralyn júrgizý quqyǵy joq kúıinde basqarý, arnaýly dybystyq sıgnaldardy qoldaný erejelerin jıi buzady. Ótken demalys kúnderi atalǵan turaqta quqyq buzýshylyqqa jol bergen 30-dan astam júrgizýshi anyqtalyp, ákimshilik jaýapkershilikke tartyldy» -dep habarlady departamenttiń baspasóz qyzmeti.

Máselen, 22 tamyzda «BMW» markaly kóliginiń júrgizýshisi kólikti turǵan ornynda aınaldyryp, manevr jasaý erejesin buzǵan. Sóıtip, asfalt jabynyn búldirgeni jáne kólik quralyn tehnıkalyq baıqaýdan ótpegen kúıinde basqarǵany úshin QR Ákimshilik quqyq buzýshylyq týraly Kodeksiniń 595-babynyń 1-bólimimen, 630-babynyń 1-bólimimen jáne 590-babynyń 9-bólimimen ákimshilik jaýapkershilikke tartylyp, 17 502 teńge kóleminde aıyppul salyndy. Al, 23 tamyzda túni saǵat 01:05 shamasynda «Lada Prıora» markaly kóliginiń 23 jastaǵy júrgizýshisi arnaýly dybystyq sıgnal ornatqany úshin QR Ákimshilik quqyqbuzýshylyq týraly Kodeksiniń 603-babynyń 2-bólimimen ákimshilik jaýapkershilikke tartyldy. Arnaýly dybystyq qurylǵysy tárkilendi.

Eske sala ketelik, buǵan deıin Atyraýda Qazaqstan týyn kóligine japqan júrgizýshi jazalanǵanyn jazǵan bolatynbyz.