Atyraý áýejaıynda bolǵan oqıǵaǵa qatysty tergeý aıaqtaldy
ATYRAÝ. QazAqparat - Atyraý halyqaralyq áýejaıynda polıtsııa qyzmetkeriniń atys qarýynan baıqaýsyzda áıel adamdy aıaǵynan jaraqattaýymen baılanysty tergeý sharalary aıaqtaldy.
Áıel adamdy aıaǵynan atyp alǵan polıtsııa qyzmetkeri ishki ister qyzmetkeriniń atyna kir keltirgeni úshin jumystan ketti, dep habarlaıdy QazAqparat.
«Sonymen qatar áýejaıdaǵy jelilik bólim bastyǵy men kóliktegi polıtsııa bólimi bastyǵynyń eki orynbasary qyzmetterinen ketti. Osy kezde bólim bastyǵyn jumysynan bosatý máselesi talqylanyp jatyr. Qarý qoldaný erejesin buzý faktisi boıynsha qylmystyq is qozǵaldy»,-dep habarlady QR ІІM-niń Kóliktegi polıtsııa departamenti bastyǵynyń orynbasary Marat Álkenov.
Aıta keteıik, oqıǵa juma kúni shamamen saǵat 16-30-dar kezinde Atyraý qalasyndaǵy halyqaralyq áýejaıdyń jolaýshylar termınalynda boldy. Polıtsııanyń kezekshilikte turǵan qyzmetkeri M.M. qarý saqtalatyn bólmede PM tapanshasynan baıqaýsyzda oq atqan. Oqıǵa bankterdiń biriniń ınkassatsııa qyzmetiniń qarýyn tekserý barysynda bolǵan. Qarýdan shyqqan oq áýejaıdyń zalynda turǵan jolaýshy áıeldiń aıaǵyna tıgen. Zardap shekken áıel oqıǵa bolysymen-aq medıtsınalyq kómek kórsetý úshin oblystyq aýrýhanaǵa jetkizildi. Al oqıǵa ornyna Atyraý stansasynyń jelilik polıtsııa bóliminiń jedel toby men Atyraý oblystyq Polıtsııa departamentiniń ókilderi jetti.
«Men aýrýhanadan endi ǵana keldim. Jaraqat alǵan adammen kezdestim. Onyń jaǵdaı qanaǵattanarlyq jáne operatsııa jasalmaıtyn boldy. Ol qarýdyń kezdeısoq jaǵdaıda atylǵanyn túsinip otyr, sol sebepti qatty narazylyq bildirip otyrǵan joq. Ol aqyly palataǵa kóshirildi. Zardap shekken adamdy qajetti dári-dármektermen qamtamasyz etý men ózge de shyǵyndardy Kóliktegi polıtsııa departamenti óz moınyna alady. Biz jaǵdaıdy baqylap otyramyz, ıaǵnı aldaǵy ýaqytta qandaı da bir zertteýlerge bolmasa ózge de qajettilikter bolatyn bolsa shyǵynyn ózimiz kóteremiz»,- deıdi M.Álkenov.
Ol sonymen qatar, Atyraýdaǵy oqıǵadan soń áýejaılar men temirjol vokzaldaryndaǵy barlyq arnaıy bólmeler tekseriletin bolady. Olardyń barlyǵy tıisti talaptarǵa sáıkestendiriledi.
