Atyraý áýejaıyna sapasyz qyzmet kórsetkeni úshin aıyppul salyndy

ATYRAÝ. QazAqparat - «Qazaqstannyń avıatsııalyq ákimshiligi» AQ jerústi qyzmet kórsetý qyzmetteriniń (jumystarynyń) sapasyn baqylaý men qadaǵalaýdy júzege asyrý aıasynda 2022 jylǵy 27 jeltoqsanda 2021 jyly ınspektsııalyq tekserý qorytyndylary boıynsha anyqtalǵan eskertýlerdi oryndaý jáne joıý boıynsha Atyraý áýejaıyna jospardan tys ınspektsııalyq tekserý júrgizildi, dep habarlaıdy QazAqparat.

Azamattyq avıatsııa komıtetiniń málimetinshe, qorytyndy tekserý barysynda jolaýshylarǵa kórsetiletin qyzmetterdiń sapasyna áser etetin buzýshylyqtar belgili bolǵan.

«Atap aıtqanda, jolaýshylar lıftiniń bolmaýy, júrip-turýy shekteýli jolaýshylarǵa qyzmet kórsetý úshin sharttardyń zańnamalyq talaptarǵa sáıkes kelmeýi anyqtaldy. Sondaı-aq 2021-2022 jyldarǵa arnalǵan túzetý is-qımyldary josparynyń oryndalmaý deregi tirkeldi», - dep jazdy komıtetten.

Tekserý nátıjeleri boıynsha ınspektorlyq nusqama jazylyp, oryndalý merzimi 1 aı bolatyn anyqtalǵan eskertýlerdi joıý jónindegi is-qımyl jospary jasaldy.

Alaıda, anyqtalǵan eskertýler merziminde joıylmaǵandyqtan, «ATMA – Atyraý áýejaıy jáne tasymaldaý» AQ ınspektorlyq nusqamany oryndamaǵany jáne Qazaqstan Respýblıkasynyń qoldanystaǵy zańnamasyn saqtamaǵany úshin 500 AEK (1 725 000 teńge) mólsherinde ákimshilik aıyppul tóleýge tartyldy.