Atyraý áýejaıyna Hıýaz Dospanovanyń esimi berilse - senator S. Eńsegenov
ASTANA. 1 naýryz. QazAqparat - Atyraý áýejaıyna qazaqtyń batyr qyzy Hıýaz Dospanovanyń esimi berilse eken.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan depýtat Sársenbaı Eńsegenov osyndaı másele kóterdi.
«Qazaq batyr qyzdarynyń biregeıi - Hıýaz Dospanova. Aǵymdaǵy jyldyń 15 mamyrynda Halyq qaharmany, qazaqtyń batyry Hıýaz Dospanovanyń týǵanyna 90 jyl tolady. Sondyqtan da halqymyzdyń dańqty qyzdarynyń esimin eldiń jadynda máńgige qaldyrý úshin oblys jurtshylyǵy Atyraý áýejaıyn Hıýaz Dospanovanyń atymen ataý týraly usynystaryn bildirip jatyr», - deıdi S. Eńsegenov. Onyń aıtýynsha, Atyraý halyqaralyq áýejaıyna Uly Otan soǵysynda óshpes erlik kórsetken, Halyq qaharmany Hıýaz Dospanovanyń esimin berý ábden laıyqty shara bolmaq. «Bul bizdiń aǵa urpaq ókiline qurmet qana emes, bolashaq jas urpaqty otanshyldyqqa tárbıeleýdegi mańyzdy qadam bolatynyn eskerý kerek», - dedi senator.
Depýtattyń aıtýynsha, ultymyzdan shyqqan tuńǵysh áskerı ushqysh qyz Uly Otan soǵysy jyldarynda áıelderden quralǵan 46-shy gvardııalyq ushqyshtar polkinde áskerı mindetin atqardy. Ol 1942-1945 jyldar aralyǵynda 300-den astam áýe shaıqastaryna qatysty. Erligi úshin Keńes odaǵynyń «Qyzyl juldyz», ekinshi dárejeli «Otan soǵysy» ordenderimen jáne kóptegen medaldarmen marapattalǵan. Soǵystan keıin H. Dospanova respýblıkalyq deńgeıdegi laýazymdy qyzmetter atqaryp, eldiń áleýmettik-ekonomıkalyq damýyna da óz úlesin qosty. QR Prezıdentiniń Jarlyǵymen 2004 jyly Hıýaz Dospanovaǵa Halyq qaharmany ataǵy berildi.
