Atyraý aýasynda kúkirtti sýtek shekti normadan asyp ketken - ekologtar
Atyraý oblystyq ekologııa departamentiniń baspasóz qyzmetinen málim etkendeı, búgin, 28 naýryzda jaǵymsyz ıiske baılanysty atmosferalyq aýanyń sapasyna monıtorıng júrgizilgen.
«Búgin aýa sapasyna taldaý júrgizý kezinde jeldiń baǵyty soltústik-batystan, atmosferalyq aýa temperatýrasy +13S, qysym - 756, ylǵaldylyq - 73% jáne jeldiń jyldamdyǵy sekýndyna 10 metrdi qurady. Bul baǵytta Atyraý qalasynyń oń jaǵalaýynda «Kvadrat» býlaný alańy ornalasqan. Osyǵan oraı Atyraý oblysynyń mamandandyrylǵan tabıǵat qorǵaý prokýratýrasy men oblystyq sanıtarııalyq-epıdemıologııalyq baqylaý departamentiniń, oblystyq boıynsha ekologııa departamentiniń mamandary, BAQ ókilderi jáne «Kvadrat» býlaný alańyn qalpyna keltirý jumystaryn júrgizip jatqan «Pavlodar ózen aılaǵy» AQ ókilderiniń qatysýymen atmosferalyq aýadan synama alyndy. «Kvadrat» býlaný alańynda júrgizilgen monıtorıngtiń nátıjesinde kúkirtti sýtek ıngredıentiniń ruqsat etilgen shekti shoǵyrlanýdan asý faktisi anyqtaldy», -dep habarlady departamenttiń baspasóz qyzmeti.
Al, Atyraý oblystyq sanıtarııalyq-epıdemıologııalyq baqylaý departamentiniń basshysy Mádenıet Tanaýovtyń aıtýynsha, aýadaǵy jaǵymsyz ıis tynys alýǵa, qan tamyrlary men júrekke keri áserin tıgizedi.
«Atmosferalyq aýadan synama alyndy. Synamaǵa taldaý júrgiziledi. Onyń qorytyndysyna sáıkes shara qoldanylady», -dep málim etti Mádenıet Tanaýov.
Eske sala ketelik, buǵan deıin Atyraý turǵyndary aýadaǵy sasyq ıiske shaǵymdanǵanyn jazǵan bolatynbyz.
