«Atyraý-Astrahan» jolynyń qurylysy 2022 jyly tolyq aıaqtalady - Nurlan Noǵaev

NUR-SULTAN - ATYRAÝ. QazAqparat - 2022 jyly paıdalanýǵa beriletin «Atyraý-Astrahan» jolynyń qurylysy qarqyndy júrip jatyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Nurlan Noǵaev aıtty, dep habarlaıdy QazAqparat.

«Reseı Federatsııasy shekarasy - Atyraý» jolyn qalpyna keltirýge baǵyttalǵan jumystar josparǵa saı júzege asyp jatyr. Joldyń jalpy uzyndyǵy - 277 shaqyrym. Búgingi tańda trassanyń 60 shaqyrymyn jóndeý jumystary bastaldy. Jobalyq-smetalyq qujattamaǵa saı qurylys jumystary 2021 jyly aıaqtalýy tıis. Biraq, qurylys qarqyny jaqsy bolǵandyqtan qurylysshylar erte bitirýi de múmkin», - dedi aımaq basshysy.

Atyraý - Astrahan – «Nurly jol» baǵdarlamasy aıasynda júzege asyrylyp jatqan eki baǵyttaǵy joldyń biri. 2022 jyly tolyqtaı paıdalanýǵa beriledi dep josparlanyp otyr. Ekinshi baǵyt – Atyraý-Aqtóbe joly, onyń 27 shaqyrymy tóseldi, 88 shaqyrymy salynyp jatyr. Qalǵan 40 shaqyrymynda daıyndyq jumystary júrýde.

Sonymen qatar, aımaqta kólik ınfraqurylymyn damytý boıynsha jol-qurylys jumystary júzege asýda. Jalpy uzyndyǵy - 165 shaqyrym bolatyn 216 kóshe, 32 eldi mekende jol salý josparlanǵan. Oblys ortalyǵynda 4 basty kóshe keńeıtiledi, keńeıtý jobasy: jol tósemin kóbeıtý, jańa LED jaryqtandyrý ornatý, jaıaý júrginshiler jolyn, velo-jol salý jumystaryn qamtıdy. Keler jyly oblys ortalyǵynda 7 kósheni keńeıtý josparlanǵan. 45 shaqyrym jańa jol salynady.

«Búginde Atyraýda jáne qala mańyndaǵy eldi mekenderdegi sapaly jol úlesi – 85 paıyz», - dep atap ótti Nurlan Noǵaev.