«Atyraý - Astrahan» trassasynyń keı ýchaskeleri jyl sońyna deıin el ıgiligine beriledi

ATYRAÝ. QazAqparat – Qazir «Atyraý - Astrahan» tasjoly qaıta jóndeýden ótip jatyr. Búginde joldyń 60 shaqyrymyna asfalt tóseldi. Kórshi Reseımen aramyzdy jalǵaıtyn tasjol qurylysy týraly «QazAvtoJol» ulttyq kompanııasynyń Atyraý oblysy boıynsha fılıalynyń dırektory Bolatbek Aıtbekov aıtyp berdi, dep habarlaıdy QazAqparat tilshisi.

«Biz qazir «Atyraý - Astrahan» tasjolynda turmyz. Joldyń jalpy uzyndyǵy - 277 shaqyrym. Onyń ishinde 60 shaqyrymyna búginde asfalt tóseldi. Qazir qalǵan 217 shaqyrym joldy qaıta jóndeý jumysy júrip jatyr. Jol jóndeý jumystary 4 ýchaskege bólingen. 500-den astam jumysshy 400 shaqty tehnıkanyń kómegimen eńbektenip jatyr. Qurylys materıaldary kórshi Mańǵystaý jáne Aqtóbe oblysynan jetkiziledi. Materıal jetkizýde vagon sanynyń azdyǵy baıqalady. Jol uzaq, keıbir aımaqtarǵa temirjol qatynasy barmaıdy. Buǵan deıin «Atyraý - Astrahan» úshinshi sanatty bolsa, endi ekinshi sanattaǵy tasjol salynyp jatyr. Joldyń eni buryn 7 metr bolsa, endi 9 metrge jetedi», - dedi Bolatbek Aıtbekov BAQ ókilderine arnalǵan týr barysynda.

Fılıal basshysynyń dereginshe, bıyl osy joldy salýǵa jáne jóndeý jumystaryna 30 mlrd teńge qarjy bólindi.

«Bul joldy salý 2020 jyly bastalǵan. Degenmen jobada jergilikti jerdiń ereksheligi eskerilmegen soń merdiger kompanııalar jobany qaıta qarady. Bıyl jyldyń sońyna deıin joldyń biraz bóligine asfalt tósep, paıdalanýǵa beremiz dep josparlap otyrmyz. Bul jerde basty másele - qurylys materıaldary ýaqytyly jetse jáne aýa raıy qarasyp tursa bolǵany», - deıdi ol.

Aıta keteıik, «QazAvtoJol» ulttyq kompanııasy «Aqtóbe – Oral – Atyraý» baǵytyndaǵy respýblıkalyq mańyzy bar joldardaǵy jumys boıynsha BAQ ókilderine týr uıymdastyrdy.