Atyraý-Astrahan tasjolynyń qurylysy mamyrda bastalady
ATYRAÝ. QazAqparat- Qazirgi tańda Atyraý oblysynyń ákimi Nurlan Noǵaev tikeleı teksergen daıyndyq jáne mobılızatsııa jumystary júrgizilýde, dep habarlaıdy QazAqparat.
Búginde 60 shaqyrym jerdi qaıta qalpyna keltirý jumystary respýblıkalyq bıýdjetten qarjylandyrylýda.
«Qazir qural-jabdyqtardy daıyndaý, uıymdastyrý jumystary júrip jatyr. Bul aıda biz aınalma joldyń qurylysyn bastaýymyz kerek. Jumysqa 106 adam alyndy. Olardyń 56-sy Qurmanǵazy aýdanynan»,- dedi «Sıne Mıdas Stroı «BK»» kompanııasynyń joba jetekshisi Altaı Qamysbaev.
Qazirgi tańda jobaǵa 30-dan asa tehnıka jumyldyrylǵan.
«Joldy tóseý jumystaryn mamyr aıynan bastaımyz. Nysannyń ózinde beton ónimderi zaýytyn, topyraq aralastyratyn zaýyt salýdy josparlap otyrmyz jáne bolashaqta qýaty 2,5 myń tonna bolatyn asfaltbeton zaýytyn salamyz»,- dep atap ótti Altaı Qamysbaev.
Kestege sáıkes, Atyraý-Astrahan tasjolynyń 60 shaqyrymdyq qurylysy 2 jylǵa josparlanǵan. Aǵymdaǵy jyly 23 shaqyrymyn aıaqtaý josparlanyp otyr. Jumystyń barlyq kezeńi boıynsha oblystyń 150-ge jýyq turǵynyn jumyspen qamtý kózdelgen.
Oblys ákimi qurylysshylardyń turmys jaǵdaıymen tanysty, zaýyt qurylysy aımaǵyna baryp, birqatar naqty tapsyrmalar berdi.
«Bul joldyń qurylysy Elbasynyń Atyraý oblysyna jasaǵan sapary kezinde qoldaý tapty. Qurylystyń barlyq baǵyty jergilikti atqarýshy organdardyń baqylaýynda bolady. Jumysshylar ýaqtyly jalaqy alady, ómir súrý úshin barlyq qajetti jaǵdaılarmen qamtamasyz etiledi, qurylys qaýipsizdik tehnıkasyna sáıkes bolýy kerek. Máseleler men úzilister bolmaýy kerek», - dedi Nurlan Noǵaev.
Qalǵan 217 shaqyrym joldy qalpyna keltirý jáne damytý Eýropalyq bank esebinen josparlanǵan. Qazirgi tańda merdigerdi anyqtaý úshin baıqaý sharalary júrýde. 
