Atyraý-Astrahan tasjolynda kólik apatynan eki adam qaza tapty
ATYRAÝ. QazAqparat - Búgin Atyraý-Astrahan tas jolynda kólik apaty bolyp, eki adam ajal qushty. Taǵy eki adam aýrýhanaǵa jatqyzyldy, dep habarlaıdy QazAqparat tilshisi.
«Bul oqıǵa Atyraý oblysynyń Qurmanǵazy aýdanynda boldy. Zardap shegýshiniń ekeýi de aýyr halde. Olardyń bireýi aıaq-qol jaraqattarymen jansaqtaý bólimshesine tússe, ekinshisi neırohırýrgııa bóliminde jatyr», - dep habarlady oblystyq densaýlyq saqtaý basqarmasynyń baspasóz qyzmeti.
Oblystyq Іshki ister departamentiniń baspasóz qyzmeti oqıǵa týraly túsinik bermedi. Áleýmettik jelilerden belgili bolǵandaı, eki avtokólik jolda soqtyǵysqan.
