«Atyraý-Astrahan» tas joly qashan aıaqtalady

ASTANA. QazAqparat – Bıyl Atyraý oblysynda 172 shaqyrym jol jóndeledi. Bul týraly Atyraý oblysynyń ákimi Serik Shápkenov aıtty, dep habarlaıdy QazAqparat tilshisi.

«Oblysymyzda 3 myń shaqyrym jol bar. Onyń 1 100 shaqyrymy respýbılkalyq, 1 927 shaqyrymy jerglikti jol sanalady. Jolǵa bólinetin qarajat jyldan-jylǵa ósip keledi. Byltyr 41 mlrd teńge, al bıyl 55 mlrd teńge bólindi. 172 shaqyrym jol jóndeletin boldy», - dedi oblys basshysy Ortalyq kommýnkatsııalar qyzmetindegi baspasóz máslıhatynda.

Sonymen qatar, Serik Shápkenov óńirdegi basty mindeterdiń biri – respýblıkalyq mańyzy bar «Atyraý-Astrahan» kúre jolynyń qurylysyn aıaqtaý ekendigin aıtty.

«Atyraý-Astrahan» tas jolynyń uzyndyǵy – 277 shaqyrym. Onyń 170 shaqyrymynda eki qabatty asfalt tóselip, paıdalanýǵa berildi. Jyl sońyna deıin qalǵan 107 shaqyrymyna da 2 qabatty asfalt tósep, kólik qozǵalysy úshin ashý josparymyzda bar. Jalpy, jobany 2024 jyly tolyqtaı aıaqtaımyz dep otyrmyz. Kelesi jyly úshinshi qabaty tóselip, tolyq ashylady», - dedi oblys ákimi.

Onyń aıtýynsha, Atyraý qalasynda 1 634 shaqyrym qalaishilik jol bar. Onyń 90 paıyzy qanaǵattandyrarlyq jaǵdaıda.