Atyraý - Astrahan kúre jolynyń qurylysy keıinge qaldyryldy
ATYRAÝ. QazAqparat - Naýryzda bastalýy tıis Atyraý - Astrahan avtomobıl jolynyń qurylysy shilde aıynan erte bastalmaıdy. Bul jaıly QR Investıtsııalar jáne damý mınıstrliginiń Avtomobıl joldary komıtetiniń tóraǵasy Mereke Pishembaev málim etti, dep habarlaıdy QazAqparat tilshisi.
«Oǵan QR Qarjy mınıstrligi men Islam damý banki arasyndaǵy qaryz berý týraly kelissózderdiń sozylýy sebep boldy. Qazirgi kezde qarjy bólý kelisimge qol qol qoıý protsedýralary júrip jatyr. Kelesi aıda ony Parlamenttiń qaraýyna jiberý josparlanyp otyr. Jospar boıynsha, maýsymda merdiger uıymmen kelisimge qol qoıylyp, shildede qurylys jumystary bastalýy tıis», - deıdi M. Pishembaev.
Buryn habarlanǵanyndaı, tórt ýchaskeden turatyn Atyraý - Astrahan avtomobıl jolynyń qurylysyn 2018 jyldyń kókteminde, qar erisimen bastaý josparlanǵan bolatyn. Joba quny 80 mıllıard teńge ekeni, qurylys jumystarynyń 2022 jylǵa deıin aıaqtalatyny aıtylǵan.
