Atyraý-Astrahan avtojolyn qaıta qurý jumystary kelesi jyly aıaqtalady – QR IIDM
NUR-SULTAN. QazAqparat - Atyraý-Astrahan jolyndaǵy qurylys jumystarynyń keshigýine áser etken sebepterdiń biri – jobalaý kezinde qatelik. Osy qatelikti jibergender jaýapkershilikke tartyldy.
Bul týraly elimizdiń batys óńirindegi avtojoldardyń máselelerine arnalǵan qoǵamdyq talqylaýda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty.
QR Parlamenti Senatynyń depýtaty Ǵumar Dúısembaev QR Prezıdenti janyndaǵy Ortalyq kommýnıkatsııalar qyzmetinde ótken kezdesý barysynda Atyraý-Astrahan avtojoly qurylysynyń keshigý sebepteri jáne qurylys materıaldarynyń qymbattaýy jańadan kidirister týdyrý múmkindigi týraly másele kóterdi.
Suraqqa jaýap bergen QR IIDM basshysy jalpy uzyndyǵy 277 shaqyrymdyq avtojoldy rekonstrýktsııalaý quny 87,4 mlrd teńgeni quraıtynyn atap ótti. 2019-2021 jyldary Reseı shekarasynan Ganıýshkıno kentine deıingi uzyndyǵy 60 shaqyrym bolatyn joldy qaıta qurýdyń birinshi kezeńi iske asyryldy. Jumysqa 22 mlrd. teńge jumsaldy. Jańa jabyndy salynǵan ýchaskede qazir qozǵalys ashylǵan.
