Atyraý-Astana baǵyty boıynsha tikeleı jolaýshylar temirjol qatynasyn ashý qajet - senator Q. Işanov
ASTANA. Maýsymnyń 10-y. QazAqparat /Qanat Mámetqazyuly/ - Atyraý-Astana baǵyty boıynsha tikeleı jolaýshylar temirjol qatynasyn ashý qajet. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qaırat Işanov osy máseleni kóterdi.
«Atyraý oblysynda memlekettik mańyzy bar iri munaı jáne gaz ónerkásibi kásiporyndary ornalasqan, óńirde jergilikti turǵyndardan basqa Qazaqstan Respýblıkasynyń myńdaǵan azamattary vahtalyq ádispen jumys isteıdi. Atyraý oblysynyń eldiń ózge aımaqtarynan alshaqtyǵyn eskersek, bul aımaqtyń jáne jalpy eldiń damýy úshin ózge aımaqtarmen qatynas joldarynyń bolýy óte mańyzdy sanalady», dedi senator. Onyń aıtýyna qaraǵanda, qazirgi ýaqytta, Atyraý jáne Astana stantssylarynyń arasynda tikeleı jolaýshylar poezdary qatynamaıdy. Elordadan qatynas № 691 «Atyraý-Aqtóbe» jolaýshylar poezyna 2 vagondy tirkeý arqyly júrgiziledi. Ol vagondar taq kúnderi № 691 poezynan ajyratylyp, Aqtóbe stansysynda № 57/58 «Aqtóbe-Astana» jolaýshylar poezyna, al jup kúnderi Qandyaǵash stansysynda № 37/38 «Mańǵystaý-Astana» poezyna tirkeledi eken.
Jáne bul vagondar Qandyaǵash stansysynda № 37/38 «Mańǵystaý-Astana» qatynasyndaǵy poezǵa tirkelý úshin 6 saǵat 17 mınýt, al keri baǵytta № 692 «Aqtóbe-Atyraý» poezyna tirkelý úshin 2 saǵat 41 mınýt toqtap turatyn kórinedi.
«Qazaqstan temir joly» Ulttyq kompanııasy» Aktsıonerlik qoǵamynyń tirkelmeli vagondardy alyp tastaý týraly sheshimi onsyz da alshaq ornalasqan aýdandardyń oqshaý qalýyna ákelip soqtyrady jáne eldiń ózge aımaqtarymen qatynasyna qosymsha qıyndyqtar týǵyzady. Aımaq damýynyń qatynas joldaryna tikeleı táýeldi ekenin eskersek, qoldanystaǵy tirkelmeli vagondar qazirgi ýaqytta bul baǵyt boıynsha jolaýshylardy tasymaldaý kólemi boıynsha qajettilikterdi qanaǵattandyrmaı otyr», dedi senator.
