Atyraý ákimi JEO-daǵy apattan keıin úılerge jylý berilýin baqylaýǵa aldy
ATYRAÝ. QazAqparat - Atyraý qalasynyń ákimi Alımuhammed Quttumuratuly jylý berýdi qalpyna keltirý jumystary júrgizilip jatqan Almagúl yqshamaýdanynda boldy, dep habarlaıdy QazAqparat tilshisi.
«Atyraý JEO» AQ prezıdenti Aıbar Rahmanovtyń aıtýynsha, Almagúl yqshamaýdanyndaǵy 16 qabatty turǵyn úılerge jylý berilgen. Tap qazir sý qubyrynyń qysymyn durystaý jumystary júrip jatyr.
«Gıdravlıkany qalpyna keltirgennen keıin bul úılerge keshkisin jylý beriledi»,-dedi Aıbar Rahmanov.
Sonymen qatar, qazir Balyqshy yqshamaýdanynda ystyq sýmen jabdyqtaý apatty jaǵdaıda isten shyqty.
«Osynyń sebebinen Balyqshy yqshamaýdanyndaǵy jeti úı ystyq sýsyz qaldy. «Grand Master» JShS jumysshylary apattyń saldaryn joıý jumystaryn júrgizip jatyr, turǵyndardy túsinistikpen qaraýǵa shaqyramyz»,-deıdi qalalyq TKSh, jolaýshylar kóligi jáne avtokólik joldary bóliminiń basshysy Shákir Keıkın.
Atyraý qalasynyń ákimi Alımuhammed Quttumuratuly Almagúl yqshamaýdanyna baryp, turǵyndarmen kezdesti. Shahar basshysy problema tikeleı oblys ákiminiń baqylaýynda ekenin, barlyq quzyrly organdar jumyldyrylǵanyn atap ótti.
Eske sala keteıik, 19 qańtar kúni keshkisin JEO-nda eki magıstraldy qubyr jelisiniń birinen uzyndyǵy bir jarym metrlik ýchaskede sý ketkeni anyqtaldy. Zaqym kelgen tustaǵy sýdy toqtatý úshin barlyq sorǵylar óshirildi, sonyń saldarynan qaladaǵy jylý jelisinde jylý berý toqtady. Apattyq jaǵdaıdy joıý boıynsha jumystar Atyraý oblysynyń ákimi Nurlan Noǵaevtyń jeke baqylaýynda. Oqıǵa ornynda apattyń saldaryn joıý maqsatynda vedomstvoaralyq jedel shtab quryldy.
Zaqym kelgen ýchaskeni óshirgennen keıin qubyr jelileri sýmen toltyrylyp, qalaǵa jylý berý qalpyna keltirildi.
Qazir magıstraldy qubyr jelisiniń zaqym kelgen ýchaskesin aýystyrý jumystary jalǵasyp jatyr.
