Atyraý ákimi turǵyndarǵa kógershindi tamaqtandyrýǵa tyıym saldy

ATYRAÝ. QazAqparat – Atyraý qalasynyń ákimi Shákir Keıkin jergilikti turǵyndardy Qanysh Sátbaev eskertkishi mańyndaǵy qustarǵa jem bermeýge shaqyrdy, dep habarlaıdy QazAqparat.

Qala basshysy eskertkish mańynda qustar kóp jınalatynyn aıtyp, antısanıtarııaǵa shaǵymdandy.

«Qalamyzdyń aǵa býyn ókilderi, kózi ashyq kókiregi oıaý ár azamattyń mazalaıtyn máseleleriniń biri – qalamyzda ornalasqan qazaǵymyzdyń maqtanyshy, ult zııalysy, elimizdiń tuńǵysh akademıgi Qanysh Imantaıuly Sátbaev eskertkishiniń búgindegi syıqy. Buǵan sebep el syılaǵan aǵamyzdyń jalǵyz eskertkishiniń basyna kógershinder qonyp, qustardyń mekenine aınalǵan. «Arnaýly avtobaza» qyzmetkerleri qajetti tazalyq jumystaryn júrgizgenmen, burynǵy qalpyna qaıta túsýde», – dep jazdy Shákir Keıkin áleýmettik jelidegi paraqshasynda.

Ákim osy máseleni sheshý úshin ýchaskelik polıtsııa, «Arnaýly avtobaza» JShS basshysy jáne jaýapty bólim basshylarymen birge atalǵan orynǵa baryp qaıtqan. Sóıtip abattandyrý qaǵıdasyn buzǵandarǵa quqyq buzýshylyq talaptaryna saı shara qoldanýdy tapsyrǵanyn aıtady.

«Rasymen, tazalyq jumystary júrgizilgenmen, qaıtadan qorektenýge kelgen qustardyń sańǵyryǵynan alańda aıaq alyp júrý múmkin emes, antısanıtarlyq jaǵdaı desek artyq bolmas. Osy maqsatta qala turǵyndaryna bul jerge kelip qustardy qorektendirmeýge usynys bildiremin ári arnaıy habarlandyrý jazylyp, taratylatyn bolady. Ómirden ótken uly tulǵalarǵa eskertkish ornatý elimizdiń tarıhyn, eldigimizdi bildiredi. Osyǵan baılanysty polıtsııa basshylyǵyna aldaǵy ýaqytta kógershinderge tamaq qaldyǵyn tastaǵan azamattar men azamatshylarǵa abattandyrý qaǵıdasyn buzǵany úshin quqyq buzýshylyq talaptaryna saı shara qoldanýdy tapsyrdym.

Árıne, kógershin – beıbitshilik sımvoly ekeni sózsiz. Biraq búgingi eskertkish basyndaǵy kórinis bul túsinikke saı kelmeıdi. Qazaqtyń mańdaıyna bitken nar tulǵamyz, ómirge eki kelmeıtin aǵamyzdyń eskertkishine syılastyqpen qarap, turǵyndar meniń usynysymdy qoldaıdy dep esepteımin. Osy maqsatta qala turǵyndaryn bul jerge kelip, kógershinderge nan qaldyqtary men basqa da taǵamdardy tastamaýǵa shaqyramyn!» - dedi ol.

Aıta keteıik, Shákir Keıkin jýyrda oblys ákimi Serik Shápkenovtiń ókimimen, Prezıdent Ákimshiliginiń kelisimimen Atyraý qalasynyń ákimi laýazymyna taǵaıyndalǵan bolatyn.