Atyraý ákimi turǵyndardyń 1 myńǵa jýyq suraǵyna jaýap beredi
ATYRAÝ. QazAqparat - Atyraý qalasynyń turǵyndary bir aı boıy qala basshysyna jazbasha túrde jáne áleýmettik jeliler arqyly suraq qoıý múmkindigine ıe boldy, dep habarlaıdy QazAqparat qalalyq ákimdiktiń baspasóz qyzmetine silteme jasap.
Oblys ortalyǵy men irgeles ornalasqan eldimekenderdiń turǵyndary qoıǵan 1 000 saýaldyń júzge jýyǵy Álımuhammed Quttumuratulynyń atyna jazbasha túrde túsken.
Aıta keteıik, qala ákiminiń esep berý kezdesýinen eki apta buryn qaladaǵy qoǵamdyq oryndarda - Sátpaev, Baımuhanov kóshelerindegi HQKO, Avangard yqshamaýdanyndaǵy jumyspen qamtý ortalyǵy, «Saraıshyq» bazarynda arnaıy hat salatyn jáshikter ornatyldy.
«Keri baılanys úshin turǵyndar telefon nómiri men mekenjaıyn kórsetýleri tıis boldy. Barlyq suraqtar óńdeldi, eń qyzyqty saýaldardy qala ákimi halyqqa esep berý kezdesýinde atap ótedi», - dep habarlady Atyraý qalalyq ákimdiginiń baspasóz qyzmetinen.
Sonymen qatar, 900-den astam saýaldy Álımuhammed Quttumuratuly áleýmettik jelilerdegi paraqshasynda qabyldaǵan.
Suraqtardyń basym bóligi jeke úı salýǵa jer telimin bólý, jol qurylysy, jaıaý júrginshiler joly, kósheniń jaryǵy máselelerine qatysty boldy.
«Ákimge suraq joldaǵan turǵyndar esep berý kezdesýinen keıin kóp keshikpeı jaýap alatyn bolady», - dep naqtylady Atyraý qalalyq ákimdiginiń baspasóz qyzmeti.
Qala ákimi Álımuhammed Quttumuratulynyń esep berý kezdesýi 13 aqpanda saǵat 10:00 de «Qurmanǵazy» mádenıet úıinde ótedi.
