Atyraý ákimi názik jandardy Halyqaralyq áıelder kúni merekesimen quttyqtady
ATYRAÝ. QazAqparat - Atyraý oblysynyń ákimi memlekettik qyzmettegi áıelder qaýymyn merekemen quttyqtady. Merekelik dastarxanǵa 300-ge jýyq názik jandar qatysty, dep xabarlaıdy QazAqparat tilshisi.
Sharada sóz alǵan oblys ákimi Nurlan Noǵaev barsha qyz- kelinshekterge alǵysyn aıtty.
«Barshańyzdy tól merekelerińizben shyn júrekten quttyqtaımyn. Aspanymyz ashyq, elimiz tynysh bolsyn! Otbasylaryńyzdaǵy jylýlyqtyń sarqylmaýyn tileımin. Mereke qutty bolsyn! Elbasymyz Nursultan Nazarbaev eldiń aldyna áleýmettik sala boıynsha aýqymdy mindetter qoıyp otyr. Sonyń ishinde ásirese ana men bala máselesine erekshe nazara aýdaryp otyr. Jaqynda bolǵan «Nur Otan» partııasynyń XVIII sezinde atqarýshy bılik ókilderine, mekeme basshylaryna ana men balaǵa, kópbalaly analarǵa jaǵdaı jasaý jóninde naqty tapsyrmalar berdi. Qazirgi tańda úkimet is-sharalar josparyn jasaqtap jatyr. Men óz atymnan osy otyrǵan analarǵa, qyz-kelinshekterge, rızashylyǵymdy bildirgim keledi. Sizder búginge deıin urpaq sabaqtastyǵy degen uǵymdy berik ustanyp kelesizder. Denderińizge saýlyq, otbasylaryńyzǵa amandyq tileımin»,- dedi ákim.
Merekelik sharada oblystyń damýyna úles qosqan 20-dan asa qyzmetker oblys ákiminiń alǵys xatymen marapattaldy. 3 anaǵa Altyn alqa, 4 anaǵa kúmis Alqa tósbelgisi tabystaldy.
Shara óner juldyzdarynyń merekelik kontsertine ulasty.
