Atyraý ákimi kásipkerlerdi qalanyń damýyna úles qosýǵa shaqyrdy
ATYRAÝ. QazAqparat - Atyraý ákimi Álımuhammed Quttumuratuly bıznes ortalyǵynyń ókilderine qalada júzege asyrylyp jatqan jobalar týraly aıtyp berdi, dep habarlaıdy QazAqparat tilshisi ákimdiktiń baspasóz qyzmetine silteme jasap.
Atyraýda qala ákiminiń kásipkerlermen kezdesýi ótti. Іs-shara «suraq-jaýap» formatynda ótti, oǵan oblys ortalyǵynyń 200-ge jýyq kásipkeri qatysty.
Álımuhammed Quttumuratulyna qoıylǵan saýaldardyń basym bóligi kásipkerlik nysandaryn salýǵa jer telimderin bólý, ınfraqurylym júrgizý, monopolısterge qatysty máselelerdi sheshý jaıly boldy.
Qatysýshylardyń suraqtaryna jan-jaqty jaýap bergen qala ákimi kásipkerlerge Atyraýdyń damýy men órkendeýine úles qosýdy ótindi.
"Búgingi tańda qala 150 mlrd teńgege jýyq jobalardy júzege asyrýda. Barlyq jobalar qala úshin óte mańyzdy. Jergilikti bıýdjetten olardy júzege asyrý úshin qarajat jetispeıtinin túsinemiz, sondyqtan kásipkerlerdi qalanyń damýyna úles qosýǵa jáne qalany jaqsartýǵa kómektesýge shaqyramyz.
Mysaly, ótken jyly kásipkerler kóptegen sport alańdaryn salǵan. Aqtóbeniń kásipkerleri 1 mlrd teńgeden astam somaǵa obektiler salǵan. Qulsary qalasynda jergilikti kásipkerlerdiń biri 800 mıllıon teńgege balabaqsha salyp, ony qalaǵa syıǵa tartty. Bıylǵy jyly bıznes ókilderi bizdiń Atyraýdy jaqsartýǵa kómekteskeni jón bolar edi", - degen ótinish bildirdi ol.
Qala ákiminiń aıtýynsha, kásipkerler qazirgi tańda elimizde kóptegen júzege asyp jatqan baǵdarlamalarǵa demeýshi retinde belsendi qatysa alady. "Týǵan jerge taǵzym", «Jomart júrek». Elbasynyń "Bolashaqqa baǵdar: rýhanı jańǵyrý" baǵdarlamasyn júzege asyrý aıasynda qalanyń damýyna eleýli úles qosýǵa múmkindik bar.
Álımuhammed Quttumuratulynyń aıtýynsha, 2019 jyly oblys ortalyǵynda 100 turǵyn úıdi jabdyqtaý josparlanyp otyr. Qazirgi ýaqytta jańa jobanyń tujyrymdamasy ázirlenýde. Ony júzege asyrýda kásipkerler belsendilik tanyta alady.
