Atyraý ákimi qalany bezendirý jumysyn synǵa aldy
Qala ákimdigi baspasóz qyzmetiniń habarlaýynsha, búgin apparattyq keńes barysynda qala basshysy Atyraý qalasyn kógaldandyrý men abattandyrýǵa qatysty birden birneshe másele kóterdi. Atap aıtqanda, Alımuhammed Quttumuratuly jasyl ekpelerdi sýarý, aǵashtardy kesý, sándik gúlder otyrǵyzý jáne shaǵyn arhıtektýralyq qurylystar ornatý máselelerin qozǵady.
«Qala turǵyndary tarapynan aǵashtar men butaly ósimdikterdi sýarýdyń nasharlyǵyna baılanysty kóptegen renishter aıtylýda. Qazir ortalyq kóshelerdiń ózinen qýraǵan kóshetterdi baıqaýǵa bolady. Sýarýǵa arnalǵan barlyq sý qubyrlarynyń durystyǵyn, sý qysymynyń deńgeıin tekserý qajet. Eger tamshylatyp sýarý júıesi qalamyzǵa jaramaıtyn bolsa, onda ádettegi sý qubyryn júrgizińizder, bizdiń mindetimiz - barlyq jasyl ekpelerdi saqtaý», - dep tapsyrdy qala basshysy qaramaǵyndaǵylarǵa.
Sonymen qatar, Alımuhammed Quttumuratuly oblys ortalyǵynyń estetıkalyq bezendirilýiniń talǵamsyzdyǵyn, shaǵyn arhıtektýralyq keskinderdi jobalaý jáne qalany kógaldandyrý men sándeý kezinde ortaq júıeniń joqtyǵyn basa aıtty.
«Qala halqy sońǵy kezderi qalany bezendirýge qatysty narazylyq bildirýde, biryńǵaı tujyrymdama joq. TKSh bólimine qalany kógaldandyrý jáne abattandyrý tujyrymdamasyn ázirleýdi tapsyramyn. Oblys ortalyǵyn bezendirýge arnalǵan arhıtektýralyq nysandar men kóshetter jalpy qalanyń stıline saı etip ornatylýy tıis jáne úılesimsiz kórinbegeni jón», -dedi shahar basshysy TKSh, jolaýshylar kóligi jáne avtomobıl joldary bóliminiń basshysyna qaratyp.
