Atyraý ákimi qala turǵyndaryn jol qurylysyn baqylaýǵa shaqyrdy
ATYRAÝ. QazAqparat - Atyraý turǵyndary jol qurylysyn baqylaýǵa múmkindik aldy, dep habarlaıdy «QazAqparat» HAA tilshisi.
«2018 jyly Atyraýda 220 shaqyrym jolǵa asfalt tóseý josparlanyp otyr. Onyń qurylysynyń jobalyq-smetalyq qujattamasy jasalynyp jatyr. Josparǵa sáıkes, asfalt qalanyń 207 kóshesi men qala mańyndaǵy eldi mekenderge tóseledi.
Qala ákimi Serik Shápkenov Atyraý turǵyndaryn jol qurylysyn baqylaýǵa atsalýǵa shaqyrdy. Qala turǵyndary qurylystaǵy buzýshylyq týraly Telegram-daǵy «Atyraý oblysynyń ákimdigi» chat-arnasyna nemese «Atyraý Tsıfrlyq qabyldaý» uıaly qosymshasyna habarlaı alady», - dep málim etti qalalyq ákimdikte.
Sondaı-aq, 2018 jyly qala aýmaǵyndaǵy jáne aýyldyq okrýgterdegi 19 800 sharshy metr tas jolǵa aǵymdyq jóndeý jumystary josparlanǵan. Atyraýdyń 184 kóshesindegi 178 shaqyrym trotýardyń qurylysyna 25 mln teńge bólingen. Avtomobıl joldarynyń boıyndaǵy trotýardy jaılastyrý jumystary qalada jáne qala mańyndaǵy 9 aýyldyq okrýgte júrgiziledi.
