Atyraý ákimi balabaqshalar men mektepterdiń qurylysyn merziminde aıaqtaýdy tapsyrdy
ATYRAÝ. QazAqparat - Atyraý qalasynyń ákimi Alımuhammed Quttumuratuly Keńózek jáne Erkinqala aýyldyq okrýgteriniń mektepke deıingi jáne jalpy bilim beretin mekemeleriniń qurylysy men jóndeý jumystarynyń barysyn tekserdi, dep habarlaıdy QazAqparat tilshisi.
Óńirlik kommýnıkatsııalar qyzmetiniń habarlaýynsha, qala mańyndaǵy aýyldyq okrýgterge jumys sapary barysynda qala basshysy balabaqshalar men jalpy bilim beretin mekemelerdi aralady. Alımuhammed Quttumuratuly mektepterdegi ashanalardyń jaı-kúıimen, mektep avtobýstarynyń, sondaı-aq barlyq ınfraqurylymdardyń elektr, gaz, jylý, sýmen jabdyqtaý jáne joldyń bar-joǵymen tanysty.
Atap aıtqanda, «Raýan» balabaqshasynda kúrdeli jóndeý aıaqtalýǵa taıaý. Erkinqala aýyldyq okrýginde 290 oryndyq balabaqsha men 300 oryndyq orta mekteptiń qurylysy jalǵasýda. Jańa mektep qazan aıynyń sońynda paıdalanýǵa berilýi tıis.
Shahar basshysy tapsyrys berýshilerge de, merdigerlerge de barlyq jóndeý jáne qurylys jumystaryn jańa oqý jyly bastalǵanǵa deıin aıaqtaýdy, sondaı-aq árbir oqý ornynda kezdesip otyrǵan máselelerdi sheshýdi tapsyrdy.
«Múmkindigine qaraı 1 qyrkúıekte bilim berý mekemelerindegi barlyq jóndeý jumystary aıaqtalýy tıis. Synyptarda 40 oqýshydan otyrmaýy, al qysta túrli aýyldardyń balalary balshyq pen salqyn kúnderi kórshi eldi mekenderge qatynap júrmeýi tıis. Barlyq mektepterde ashanalar jumys jasaýy jáne balalar ystyq tamaqpen qamtamasyz etilýi qajet. Sonymen birge barlyq jumystar sapaly jáne oıdaǵydaı oryndalýy kerek».
Sondaı-aq óńir basshysy áleýmettik obektilerdiń qurylysyn salý kezinde olardyń merzimderi men mádenıetin saqtaý qajettiligin basa aıtty.
Aıta ketken jón, búgingi kúni Atyraýda jáne qala mańynda 57 orta jalpy bilim beretin mektep bar. Bularda shamamen 38 myńdaı oqýshy bilim alady. Oblys ortalyǵyndaǵy balabaqshalar sany - 43, olarǵa mektepke deıingi jastaǵy 15 myńnan astam bala barady.
Foto: liter.kz
