Atyraý ákimdigi 91 metr tuǵyrdaǵy týdyń túsirilýine qatysty vıdeoǵa túsinik berdi
Atyraý qalasynda bıiktigi 91 metrlik týtuǵyr byltyr jeltoqsan aıynda ornatylǵan edi.
Áleýmettik jelide Týdyń alynyp tastalǵany týraly vıdeo jıi jarııalanady. Osyǵan baılanysty Atyraý qalalyq ákimdiginiń baspasóz qyzmeti túsinik berdi.
«Tehnıkalyq reglamentke sáıkes memlekettik Tý ashyq, bultsyz jáne jelsiz aýa raıynda táýlik boıy turaqty kóterilýi (ornatylýy, ilinýi) tıis. Aýa raıy qolaısyz kúnderi (qar, jańbyr) qatty tabıǵı jaǵdaılar, ekpindi jeldiń jyldamdyǵy 8 m/s jáne odan joǵary bolsa, Týdyń matasy týtuǵyrdan alynýy tıis.
Atyraý qalasynda 3 tamyzda jeldiń uıytqý jyldamdyǵynyń 41 km/saǵatqa deıin jetti. Sol sebepten, merdiger mekeme qyzmetkerleri QR Memlekettik rámizder alańynda ornalasqan Týdy túsirý týraly sheshim qabyldady. Týdy túsirý kezinde aýa raıynyń qolaısyzdyǵyna baılanysty keıbir qıyndyq týyndady. Atalǵan jaıtty kezdeısoq ótip bara jatqan azamat vıdeoǵa túsirip, burmalanyp jarııalaný arqyly áleýmettik jelide tarady», - dep habarlady ákimdiktiń baspasóz qyzmeti.
