Atyńyzǵa tirkelgen SIM kartany bireýge paıdalanýǵa berýge bola ma
«Bul qylmys pa, joq pa – ol suraqqa Іshki ister mınıstrligi jaýap berýi kerek. Eger sizdiń nómirińiz arqyly qylmys jasalsa, ol is qylmystyq jáne ákimshilik jaýapkershilik boıynsha qýdalanady», - dedi Vıtalıı ıAroshenko OKQ-da ótken baspasóz máslıhatynda.
Dese de, nómirdi basqa bireýdiń paıdalanýy – zańǵa qaıshy kelmeıtinin de atap ótti.
«Siz óz atyńyzǵa nómirdi tirkep, zaıybyńyzdyń nemese balańyzdyń paıdalanýyna bere alasyz. Al eger ol nómir arqyly zańǵa qaıshy áreket jasalsa, ol ispen ary qaraı quqyq qorǵaý organdary aınalysady», - dedi spıker.
Vıtalıı ıAroshenko sonymen birge IMEI kod arqyly tekserý qazaqstandyqtarǵa yńǵaıly bolýy úshin jasalǵanyn sóz etti.
«Eger bul qyzmet bolmasa, siz óz atyńyzda qansha nómirdiń tirkelgenin bile alatyn ba edińiz? Amalsyz, búkil baılanys operatorlaryn aınalyp, tólqujatyńyzdy kórsetip, áýrege túser edińiz. Turǵyndarǵa yńǵaısyzdyq týdyrmas úshin bul qyzmetti iske qostyq», - dedi ol.
Eske sala ketsek, búgingi baspasóz máslıhatynda Vıtalıı ıAroshenko Qazaqstanda 18 mıllıon adamǵa 42 mln SIM kartanyń tirkelgenin aıtqan edi. Ol sondaı-aq, JSN arqyly bóten adamnyń sizdiń atyńyzdan uıaly nómirdi paıdalaný qaýipterin atady.