Atymdy Kókbaı aqynnyń qyzynyń qurmetine qoıǵan - Qaljan Tókenqyzy
SEMEI. QazAqparat - Súıikti isine ǵumyr boıy adal bolǵan jandar az emes. Olarǵa zamannyń aýmaly-tókpeli bolýy, bolmasa qyzmet barysynda betpe-bet keletin qıyndyqtardyń ózi kedergi emes, dep habarlaıdy QazAqparat.
Bul ózi qalaǵan mamandyqqa degen súıispenshiliktiń arqasy. Kásibin násip qana emes, ómiriniń máni dep biletinderdiń biri - semeılik Qaljan Tókenqyzy Omarbaeva. 28 jyldyq eńbek ótilinde tek qana ustazdyq jolda kele jatqan keıipkerimiz Qazaqstannyń jarqyn bolashaǵyna balanatyn bilimdi jastardy tárbıeleý basty maqsatym dep biledi.
Erke Ertistiń jaǵasyndaǵy shaǵyn aýylda Tóken men Bátımanyń shańyraǵynda 8-shi bolyp dúnıege kelgen Qaljan bolashaǵynan mol úmit kúttirgen bala bolyp ósken eken. Ákesiniń erekshe jaqsy kóretin balalarynyń biri bolǵan onyń esiminiń qoıylýynda da bir tarıh bar.
«Ákem Abaıdyń talantty shákirtteriniń biri, áıgili Kókbaı Janataıulynyń jıeni. Aqynnyń Qaljan degen tuńǵysh qyzynan týǵan. Ájemiz jastaıynan ózi erke, ózi ójet, ózi aqynjandy bolǵan eken. Tipten tarıhta «Qaljan qyzdyń ákesin joqtaýy» degen joqtaý da kezdesedi. Ákesi dúnıe salǵanda aýyl arasy shalǵaı Baltaraq pen Taqyrdyń arasynda 40 aýyz joqtaý aıtyp barǵan desedi. Mine osyndaı óneri bar ájemniń aty umytylmasyn dedi me, ákem meniń esimimdi sol kisiniń qurmetine qoıypty», -deıdi keıipkerimiz.
Áke aqyly men ana tálimin aıaqasty etpeı, ustazdyq mamandyqty tańdaǵan Qaljan Tókenqyzy alǵashqy eńbek jolyn aýyl mektebinen bastaǵan. Borodýlıha aýdanyna qarasty Novopokrovka eldi-mekenindegi bilim oshaǵynda orys synyptaryna qazaq tilinen sabaq bergen. Tabysty eńbeginiń arqasynda dırektordyń tárbıe isi jónindegi orynbasarlyǵyna deıin qyzmeti ósken.
«Alǵashqy joǵary bilimdi Almatydaǵy Qyzdar pedagogıkalyq ınstıtýtynda aldym. 4 jyl mýzyka mamandyǵyn meńgerip, baıandy erkin tarta alatyn dárejege jettim. Mýzykaǵa degen qyzyǵýshylyǵymdy týdyrǵan ákem bolatyn. Ol kisi jas kúninde konservatorııada oqyp júrgeninde soǵys bastalyp ketipti de, el qatarly maıdanǵa attanǵan eken. Oqýyn tolyq aıaqtaı almasa da, fortepıano, úrmeli aspaptarda keremet oınaıtyn. Biraq báribir de muǵalim bolý, shákirt tárbıeleý isi meni qatty qyzyqtyrdy. Men sol joldy tańdadym» - deıdi Qaljan Tókenqyzy.
20 jylǵa jýyq aýyl mektebinde tabysty eńbek ete kelip, tájirıbesi tolysqan shaǵynda Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebine aýysady. Mekteptiń kásibı baǵdarlaý keńesshisi, dırektordyń tárbıe isi jónindegi orynbasary mindetin atqarýshy bolyp eńbek ete júrip, zııatker oqýshylardy ǵana emes, ustazdyq jolyn endi bastaǵan jas mamandarǵa da qajetti aqyl-keńesin aıaǵan emes.
Búginde mektep jataqhanasynyń meńgerýshisi bolyp qyzmet jasaıtyn Qaljan Tókenqyzy ujymda abyroıly áriptes, shákirtteri úshin bilikti ustaz.
«Jataqhana jumysy óz aldyna bir álem. Mektebimizge bilim alýǵa kelgen 120 oqýshynyń oqý maýsymy kezindegi turaǵy bizde. Sabaqtan tys ýaqytta olardyń qaýipsizdigi, densaýlyǵy, oqý úlgerimi, óz qyzyǵýshylyqtary boıynsha túrli úıirmelerge qatynasýy, jeke basynyń damýy, tamaqtanýy, tipten ýaqytymen dem alýyna deıin bizdiń baqylaýymyzda. Bul bizge úlken jaýapkershilik júkteıdi. Sol úshin jataqhana tárbıeshileri soǵan laıyqty bolý úshin árkez izdený ústinde júremiz»,-deıdi ustaz.
