Aty-jónin ózgertip alǵan qylmyskerdi aqmolalyq polıtseıler Sheshenstanda qolǵa túsirdi
KÓKShETAÝ. QazAqparat - Aqmola polıtseıleri bıylǵy jyldyń 6 aıynda ózge elderdiń aýmaǵynda 8 qylmyskerdi qolǵa túsirdi, olardyń beseýi asa aýyr qylmys jasaǵan. Bul týraly Aqmola oblystyq ІІD-niń baspasóz qyzmeti habarlady.
Mysaly, Shortandy aýdandyq ІІB qyzmetkerleri Qyrǵyz Respýblıkasynyń aýmaǵynda kisi óltirgeni úshin 9 jyldan beri izdestirýde bolǵan qylmyskerdi ustady. Jedel ýákilderdiń aıtýynsha, 2007 jyldyń 26 qarashasynda Jolymbet kentinde ishimdik ishý barysynda ol tanysyn pyshaqtap óltirip, denesin aýyl syrtyna alyp shyǵyp, benzın quıyp órtep jibergen. Jazadan bassaýǵalap ol el aýmaǵynan ketip qalǵan. Osy ýaqyt aralyǵynda tártip saqshylary ony izdestirýdi toqtatpady. Onyń erekshelikteri kórsetilgen qujattar kórshi elderdiń ishki ister organdaryna jiberildi. Osy shara qylmyskerdi tabýǵa septigin tıgizdi. Shortandy aýdandyq ishiki ister bólimine kórshi Qyrǵyz Respýblıkasynyń polıtsııasynan kúdikti sol el aýmaǵynda júrgeni jóninde habar kelip jetken. Polıtsııa qyzmetkerleri birden Bishkek qalasyna qylmyskerdi quryqtaý úshin attandy.
Taǵy da bir aýyr dene jaraqatyn salǵany úshin izdeýde bolǵan qylmysker Reseı aýmaǵynda qolǵa tústi. 36 jastaǵy er adam 9 jyldan beri izdestirilgen. 2007 jyly ol Atbasar qalasyndaǵy dámhanalardyń birinde bolǵan shaǵynda, jigittermen tóbelesip qalǵan, ol qarsylasyn taıaqpen birneshe márte urǵan. Qylmys jasaǵan ol jaýapkershilikten qashyp, Sheshen Respýblıkasynda tyǵylyp júrgen. Osy ýaqytta ol tegin sheshesiniń tegine aýystyryp, ákesiniń atyndaǵy bir áripti ózgertkizip alǵan. Alaıda bul oǵan jazadan qashyp qutylýǵa kómektespedi.
Aqmola oblystyq ІІD-nde arnaıy izdestirý toby quryldy, onyń quramyna tájirıbeli izdestirýshiler endi, olar Reseı aýmaǵyndaǵy qylmyskerlerdi ustaýmen aınalysty. Reseılik áriptesterimen birge barlyq derekter qory tekserilip, sol arqyly birneshe márte kórshi eldiń aýmaǵynda zań buzǵan qylmyskerdiń meken-jaıy anyqtaldy.
Polıtsııa qyzmetkerleri barlyǵy 42 qylmyskerdi ustady, onyń ishinde 15-i aýyr qylmys jasaǵan. Memleket aralyq qylmystyq izdestirýge kelsek, Qyrǵyz Respýblıkasynan 2 qylmysker, Ingýshetııa Respýblıkasynan 2 qylmysker, Reseı Federatsııasy aýmaǵynan 4 qylmysker anyqtalyp, ustaldy.
