Aty shýly bastyq Orynbasarovtyń isi ýaqytsha toqtatyldy
ASTANA. QazAqparat - Qaramaǵyndaǵylarmen eńbek daýy bolǵan Manas Orynbasarovqa qatysty Astana qalasy kóliktik baqylaý ınspektsııasynyń qyzmettik tergeýi ýaqytsha toqtatyldy.
Bul týraly QR Investıtsııalar jáne damý mınıstrliginiń «QazAqparat» HAA resmı saýalyna bergen jaýabynda aıtylǵan. QR IDM bes qyzmetkeri 18 tamyzda bastaǵan tergeýdi Orynbasarovtyń sotqa talap aryz berýi saldarynan ýaqytsha toqtatýǵa týra kelgen.
«2016 jylǵy 6 qyrkúıekte Astana qalasynyń Esil aýdandyq soty M.I.Orynbasarovtyń talap aryzy boıynsha azamattyq is boıynsha óndiristi toqtatý týraly uıǵarym shyǵaryldy,-delingen habarlamada. Munymen M.Orynbasarov toqtamady, Azamattyq ister jónindegi Sot alqasynyń sot sheshimine jeke shaǵym berdi. Budan basqa, 29 qyrkúıekte ol aýyryp qalyp, jumysqa shyqpaǵan. Búgingi kúni onyń saýyqqany týraly aqparat joq. Vedomstvo Manas Orynbasarovtyń jaýapkershilik týraly másele sheshilgenge deıin laýazymdyq ókilettikterin oryndaýdan ýaqytsha bosatylǵanyn málimdedi.
Esterińizge salaıyq, memlekettik mekemelerdiń jıyrmaǵa jýyq qyzmetkeri ártúrli organdarǵa shaǵymdarmen júgingen. Qyzmetkerlerdiń aıtýynsha, unamaǵan qaramaǵyndaǵy qyzmetkerlerdi balaǵattaǵan, qýdalaǵan jáne jumystan qýǵan basshynyń jónsiz áreketteri men kásibı biliktiliginiń joqtyǵy shaǵymdanýǵa sebep bolǵan. Al ol bosaǵan oryndarǵa óz jerlesteri men burynǵy áriptesterin alǵan.
