Aty ańyzǵa aınalǵan «Jambyl» atty epıkalyq dastan «Qazaqstan» arnasynda (FOTO)
ASTANA. QazAqparat - Uly aqyn Jambyl Jabaevtyń 170 jyldyq mereıtoıyna qarsy «Qazaqstan» telearnasy 4-serııaly aty ańyzǵa aınalǵan poezııa alybynyń ómiri jaıly tarıhı drama ázirledi. Fılm «Qazaqstan» arnasynda 28 aqpanda, ıaǵnı aqynnyń týǵan kúninde kórermender nazaryna usynylady, dep habarlady «Qazaqstan» RTRK» AQ baspasóz qyzmeti.
Uly aqyn ózinen keıin baı mura qaldyryp, qazaq ádebıeti men mádenıetine úlken úlesin qosty. Fılmde Jambyl Jabaevtyń shyǵarmashylyǵy men ómirlik joly tolyqtaı kórsetilgen.
Fılmniń shyǵarmashylyq toby basty róldi somdaýǵa kóptegen tanymal akterlerdiń ishinen kóp ýaqyt boıy jete irikteý júrgizdi. Nátıjesinde Jambyl róli Qazaqstan Respýblıkasynyń eńbek sińirgen qaıratkeri, «Daryn» Memlekettik jastar syılyǵynyń laýreaty, akter, ánshi, kompozıtor, dramatýrg Baıǵalı Esenalıevke buıyrdy.
Baıǵalı Esenalıevtiń aıtýynsha, uly tulǵanyń beınesin ekranda somdaý ońaı emes, sebebi túsirilim kezinde salmaq bas keıipkerge túsedi.
«Meni uly aqynyń rólin somdaýǵa shaqyrǵanda, bir mezet oılanbaı kelisimimdi berdim. Kastıngke kelsem, basty rólge úmitker retinde Jambyldyń obrazyn jamylǵan kóptegen tanymal akterlerdiń fotolary ilinip tur. Olardan ozyp júlde alý qaıda!?- dep oılanyp qaldym. Desem de barǵan soń baǵymdy synap kórýge bel býdym. Sol kúni sátti kún bolǵaı, ótip kettim. Rejısser syrtqy usqynyma qarap biraz salmaq tastaý kerek dedi» - dep eske alady Baıǵalı Esenalıev.
Jambyl Jabaev kóp qyrly uly tulǵa. Onyń aqyndyǵyn bylaı qoıǵanda, jyr alyby aıryqsha sýyryp salma sheshendigimen tanymal. Jambyldyń poezııasy árdaıym qarapaıym halyqpen baılanysty bolǵan.
Teleserıaldyń negizgi kórinisteri tabıǵaty ásem Almaty oblysynyń «Úshqońyr» baýraıynda, Jambyl oblysy men Máskeýde túsirildi.
Ekranda tek qana tarıhı keıipkerdiń ómirbaıany emes, sonymen qosa HH ǵasyrdyń ortasyndaǵy elimizdiń sol dáýirdegi kórinisi kórsetilgen.
Sonymen qosa, fılmde buǵan deıin kóp aıtyla qoımaǵan uly tulǵanyń ómirinen alynǵan qyzyqty derekter kórsetiletin bolady. Sonyń biri - Jambyl men Burymnyń bir birine degen mahabbaty jaıly bolmaq.
Túsirilim toby dekoratsııalarǵa, akterlerdiń kostıýmy men obrzdaryna jete kóńil bólip, ázirlegen. Sol arqyly Jambyl ómir súrgen dáýirdiń tolyqtaı kórinisin kórsete aldy.
Fılmniń rejısseri - «Lave», «Jeńis semseri», «Qazyna» jáne taǵy basqa kınotýyndylardymen tanymal Ánýar Raıbaev.
Kórkem týyndynyń rejısseri Ánýar Raıbaev: «Biz túsirip jatqan «Jambyl» atty kórkem fılm 4 bólimnen turady. Qazaq sóz óneriniń «ımprovızatsııa» úrdisin jańa arnaǵa buryp, jańasha mazmun darytqan Jambyl atamyz, qarapaıym qara sózdiń maıyn tamyzyp, talaı aıtysta jeńiske jetken, el aldynda bedeldi edi. Judyryqtaı júregine Jetisý men Alataýdy bylaı qoıǵanda, búkil álemdi syıdyra bilgen, dana aqynnyń elge qaldyrǵan atalyq, danalyq sózderin, el búginde aýzynan tastamaıdy. Júrgen jerinde, «myń ólip-myń tirilgen» barsha qazaqqa batasyn bere júrgen Jambyldyń sol batasy búgingi kúni de jerde qalmaı, armany men oı órisi kókke órlegenine qazirgi «urpaq» biz kýá! Bizdiń maqsat Jambyl atamyzdyń «adamı» tulǵasy men qadir-qasıetin basqa qyrynan kórsetip, abyroıyn kókke órletý».
Kartınada sonymen qatar Aıgúl Úlkenbaeva (Dına Nurpeıisova), Іlııas Turmanov (Lavrentıı Berııa), Áıgerim Sámenova (Kúlásh Báıseıitova), Jolaman Ámirov (Jabaı), Ergenbaı Ábýev (Súıinbaı), Nurbek Muqysh (Kenen Ázirbaev), Boranbaı Moldahmetov (Muhtar Áýezov), Qanat Júnisov (Sáken Seıfýlın), Kentaı Aqúrpekov (Temirbek Júrgenov), Baqyt Bedelhan (Baýyrjan Momyshuly) jáne taǵy da basqa belgili akterler oınaıdy.
Aty ańyzǵa aınalǵan «Jambyl» atty epıkalyq dastandy 28 aqpanda «Qazaqstan» arnasynda tamashalańyzdar!
