Aty ańyzǵa aınalǵan tuńǵysh frantsýzdyq ǵaryshker-áıel Klodı Enere «Qazaqstan» telearnasyna suhbat berdi (FOTO)
Klodı Enere sońǵy 8 jylda eshbir BAQ-qa suhbat bermegen eken. Tipti Reseıdiń myqty degen jýrnalısterin janyna jolatpaǵan kórinedi. Araǵa 8 jyl salyp Klodı Enere hanym alǵash ret qazaqstandyq jýrnalıst Gulmıra Daırabaevaǵa suhbat beredi, dep habarlaıdy «Qazaqstan» RTRK baspasóz qyzmetinen.
1996 jyly «Baıqońyr» ǵarysh aılaǵynan ǵaryshqa ushqan frantsýz qyzy qazaq ǵaryshkeri Talǵat Musabaevpen birge jattyǵý jumystaryn jasaǵan. E.Klodı 1957 jyly 13 mamyrda Le-Krezoda dúnıege kelgen. Medıtsına ǵylymdarynyń doktory, revmatolog, avııatsııalyq medıtsına salasynyń mamany.
Enere Klodı - eki ret ǵaryshqa kóterilgen Eýropadaǵy tuńǵysh áıel. Alǵash ret 1996 jyly Reseılik kosmostyq «Soıýz TM -23» korablinde ushsa, ekinshi ret 2001 jyly «Andromeda» mıssııasy boıynsha Halyqaralyq ǵarysh stantsııasynda bolǵan.
Ol orbıtada 25 kún 14 saǵat 22 mınýt ótkizgen. 2009 jyly eń iri ǵylymı-tehnıkalyq «Universcience» mýzeıiniń prezıdenti bolyp saılandy. Bıologııa, sport medıtsınasy, ǵarysh medıtsınasy, nevrologııa salalary boıynsha birneshe kandıdattyq dıssertatsııalar qorǵaǵan, ár salada jetistikke jetip júrgen erekshe bilimdi jan.
Ǵaryshqa qatysty eńbek jolyn aıaqtaǵannan soń Enere Klodı saıasatpen de aınalysady: Jan-Per Rafferenaıdyń basshylyq etken Úkimettiń quramynda Eýropa isteri jónindegi mınıstr, keıin ǵylymı zertteýler jáne jańa tehnologııalar mınıstriniń orynbasary qyzmetin atqardy.
«Senbilik tań» baǵdarlamasy «Qazaqstan» ulttyq arnasy atynan Klodı hanymǵa oıýly qazaq shapanyn jaýyp, ǵarysh pen sulýlyq qupııalary jóninde áserli áńgime júrgizdi. Talǵat Musabaev jaıly esteliktirin aıtyp, barsha qazaqstandyqtarǵa jalyndy sálemin joldady.
11 sáýir saǵat 9.00-de «Qazaqstan» telearnasynda «Senbilik tań» baǵdarlamasynyń júrgizýshisi Gúlmıra Daırabaevanyń Klodı Eneremen áserli suhbatyn ótkizip almańyzdar.
