Aty ańyzǵa aınalǵan tennısshi Rafael Nadal Astanada sheberlik synyptaryn ótkizedi
ASTANA. QazAqparat - Álemdik tennıste aty ańyzǵa aınalǵan, jeke razrıadtaǵy «Úlken dýlyǵanyń» 14-shi týrnıriniń jeńimpazy, Olımpıada chempıony Rafael Nadal 24-25 qyrkúıekte Astanaǵa keledi, dep habarlady Qazaqstan Tennıs federatsııasynyń baspasóz qyzmetinen.
25 qyrkúıekte saǵat 19:00-de Astananyń Ulttyq tennıs ortalyǵynda Rafael Nadaldyń kórnekti matchy ótedi. Nadaldyń qarsylasy álemniń TOP-10 tennısshiler qataryna engen ataqty frantsýz tennısshisi Jo-Vılfrıd Tsonga bolmaq. Sapardy jáne juldyzdy oıyndy Qazaqstannyń Tennıs federatsııasy uıymdastyrýda.
Tanymal tenıısshilerdiń sapary tek bul matchpen ǵana shektelmeıdi. Federatsııanyń baspasóz qyzmeti atap ótkendeı, Nadal men Tsonga qazaqstandyq jas tennısshiler - «Team Kazakhstan» akademııasynyń tárbıelenýshilerimen sheberlik synyptaryn ótkizedi, Nazarbaev ýnıversıtetiniń jáne «Heılıberı» halyqaralyq mektebiniń bilim alýshylarymen áńgimelesedi. Qonaqtar Astananyń kórikti jerlerin aralaıdy. «Bul sapar - jas tennısshiler úshin baǵa jetpes múmkindik, kásibı tennısshilerdiń izin qýyp kele jatqan jastar tamasha oıynnyń kýási bolmaq. Aty ańyzǵa aınalǵan, ár oıyny - erekshe tartymdy oqıǵalarǵa toly sport sheberi kórermenderine erekshe shabyt pen tájirıbe tartý etedi», - dep atap ótti federatsııa prezıdenti B.Ótemuratov.
