Aty ańyzǵa aınalǵan «Parovoz apa» jastarǵa ósıetin aıtty - Almaty oblysy

TALDYQORǴAN.QazAqparat - Búgin Almaty oblysynyń ákimi Amandyq Batalov birneshe soǵys ardageriniń úıine arnaıy baryp, Jeńistiń 72 jyldyǵymen quttyqtap, syı-qurmetin kórsetti. Maıdangerlerge  "EKSPO-2017" kórmesiniń bıletterin jáne aqshalaı syılyq tartý etti. Óńir basshysy quttyqtaýdy aty ańyzǵa aınalǵan «Parovoz apanyń» úıinen bastady, dep habarlaıdy QazAqparat tilshisi.  

Altynaı Jaınaqqyzy nebári 18 jasqa tolar-tolmas shaǵynda soǵysqa attanǵan. Qarý ustap, urys alańynda júrmese de, parovoz júrgizýshileri strategııalyq mańyzy bar tapsyrmalar oryndady. Sondyqtan, olar maıdandaǵy jaýyngerlermen teń sanaldy. Qarshadaı qyz parovozdyń ottyǵyna kúnde tonnalap kómir laqtyrdy. Eshelonnyń belgilegen jerge jetýine aıanbaı ter tókti. Altynaı apa tizgindegen otarba Stalıngrad shaıqasyna qarý-jaraq pen sarbazdardy jetkizip otyrdy. Keıin sol Stalıngradtan fashıst tutqyndaryn Máskeýge tasydy.
 

«Bárinen janyma batqany, esimde qatty qalǵany myna jaıt.  Stalıngradtyń janynda Elchanki degen stantsııa bar. Sol jerden júregi myqty adam bolmasa, jylamaı ótý múmkin emes. Ólikter shapqan shópteı sulap jatyr. Biriniń ústinde biri. Bireýiniń basy, bireýiniń aıaǵy bólinip jatyr. Mundaı sumdyqty eshkim kórmesin. Dushpannyń da basyna bermesin», deıdi soǵys jyldaryn esine alǵan Altynaı áje.

Búginde Altynaı ájeniń el ishinde «Parovoz apa» atalyp ketýine Elbasynyń ózi sebepker bolǵanyn aıtyp berdi. Prezıdenttiń qabyldaýyndaǵy sátinde Nursultan Ábishuly Nazarbaev keýdesindegi tósbelgisin kórip, «Parovoz apa» dep ataǵan eken. Elbasynyń ózi erligine tamsanǵan ájeıdi  el ishinde sondan beri «Parovoz apa» dep atap ketti. Qart ájeı óńir basshysy Amandyq Batalovtyń qurmetine erekshe rızashylyǵyn bildirip, alǵysyn jaýdyrdy. Ár kez eline, halqyna jasaǵan jaqsylyǵyn bilip otyramyn dep aq batasyn berdi. Súıegi asyl ana jastarǵa ósıetin aıtýdy umytpady.
 

«Táýbá. Sender baqyttysyńdar. Senderde barlyǵy bar. Oqýdyń da, jumystyń da esigi ashyq. Denderiń saý bolsyn. Tek qana oqyńdar. Oqyǵan adam esh adamnan kem bolmaıdy. Bárin jeńip shyǵatyn - oqý. Bilimderiń bar bolsa, alynbaıtyn qamal joq.Bilimmen  qarýlanyńdar», dedi Altynaı apa.

Sondaı aq óńir basshysy, soǵys ardagerleri  Hasan Boranbaev pen Grıgorıı  Harchenkonyń úıine baryp, syı-qurmetin kórsetip,  quttyqtap qaıtty. Jyly kezdesý barysynda oqýshylar jyly lebizderin bildirip, óleń-jyrdan shashý shashty. Ardagerler kóńilin bir marqaıtty.