Aty ańyzǵa aınalǵan «Parovoz apa» ómirden ozdy
ALMATY OBLYSY. QazAqparat- Soǵys ardageri Altynaı Esbolatova 99 jasynda ómirden ozdy, dep habarlaıdy tilshisi.
Ardager ananyń qaıtys bolǵany týraly aqparatty Taldyqorǵan qalalyq ákimdigi rastady.
«Otbasy men jaqyndaryna qaıǵyryp kóńil aıtamyz. Esimizde máńgi saqatalady», - dep habarlady ákimdikten.
Altynaı Esbolatova sońǵy birneshe jylda Almaty oblysyndaǵy Ekinshi Dúnıejúzilik soǵysqa qatysqan jalǵyz áıel ardager boldy.
Altynaı Esbolatova 1921 jyly Almaty oblysynyń Aqsý aýdanynda dúnıege kelgen.
Altynaı Jaınaqqyzy nebári 18 jasqa tolar-tolmas shaǵynda soǵysqa attanǵan. Qarý ustap, urys alańynda júrmese de, parovoz júrgizýshileri strategııalyq mańyzy bar tapsyrmalar oryndady. Sondyqtan, olar maıdandaǵy jaýyngerlermen teń sanaldy. Qarshadaı qyz parovozdyń ottyǵyna kúnde tonnalap kómir laqtyrdy. Eshelonnyń belgilegen jerge jetýine aıanbaı ter tókti. Altynaı apa tizgindegen otarba Stalıngrad shaıqasyna qarý-jaraq pen sarbazdardy jetkizip otyrdy. Keıin sol Stalıngradtan fashıst tutqyndaryn Máskeýge tasydy.
9 mamyrdy Altynaı apa Frankfýrtte qarsy alyp, úıine, Almaty oblysyna 1946 jyly ǵana oralǵan. Onda ol temirjolda jumys isteýdi jalǵastyrdy.
Erligi men batyldyǵy úshin Altynaı Esbolatova biraz marapattarǵa ıe boldy, onyń ishinde І dárejeli Otan soǵysy ordeni, «Stalıngradty qorǵaǵany úshin», «Qyrymdy azat etkeni úshin», «Germanııany jeńgeni úshin» medaldarymen marapatalǵan.
