Aty ańyzǵa aınalǵan La Scala teatry «Astana Operaǵa» gastrolmen keledi
ASTANA. 3 jeltoqsan. QazAqparat - Qazaqstanda tuńǵysh ret ataqty ıtalıandyq La Scala teatrynyń gastrolderi elimizdiń bas teatry - «Astana Operanyń» bıik sahnasynda ótedi,
dep habarlaıdy QR Prezıdenti janyndaǵy Ortalyq kommýnıkatsııalar qyzmeti.
Mılannyń ataqty teatry ózimen birge Rýdolf Nýrıev redaktsııalaǵan Lıýdvıg Mınkýstyń «Don Kıhot» balettik spektaklin alyp keledi. Qazaqstandyq kórermen ıtalıandyq sheberler usynatyn, rytsar Don Kıhottyń minsiz beınesin 2014 jyldyń 30 maýsymy men 4 shilde aralyǵynda baǵalaı alady.
Ómiri qııal men ıllıýzııaǵa toly Don Kıhot oıdan shyǵarǵan óz áleminde ómir súredi, alaıda shyndyqpen betpe-bet kelgende, armanyndaǵy dúnıeniń oıran bolǵanyn kótere almaıdy. Balet tolyǵymen qýǵynshylarǵa jáne aldanǵandaryna qaramastan armandaryna qol jetkizýge nıettengen jas Kıtrı men shashtaraz Bazıl arasyndaǵy mahabbat hıkaıasynyń astarynda jatqan Don Kıhot pen onyń atqosshysy Sancho Pansanyń bastan keshken oqıǵalarynan quralǵan. Don Kıhot jel dıirmenimen kúresip, túsinde dýalanǵan baqta Dýlsıneıamen bılep júredi. Balettiń beıneli ıspandyq folklorlyq áýenmen, syǵan bılerimen jáne Drıad Koroldiginiń ǵajap álemimen úılesken jaıbaraqat kóńil-kúıi, klassıkalyq komedııa sahnasyn keltiredi. Aqkóńil Don Kıhottyń minezi ásirese, mahabbat jeńisine sán beretin sońǵy gran pa-de-de kezinde bıdiń asqan tehnıkasyn oryndaýdy talap etedi.
Ispandyq halyqtyq naqyshtaǵy kórinisterdiń kórkem dekoratsııasyn Rafael del Savıo jasap, kostıýmderdi Anna Annı ázirlegen. Spektakldi óńdegen jáne beıimdegen Djon Lanchberı. Aty ańyzǵa aınalǵan ıtalıandyq ártister «Astana Opera» teatrynyń sımfonııalyq orkestriniń súıemeldeýimen óner kórsetedi.
La Scala teatrymen aradaǵy áriptestik týraly áńgimelep bergen «Astana Opera» teatrynyń dırektory Tólegen Muhamedjanov: «Árıne, biz ózimizge úlken talap qoıamyz, sebebi biz álemdegi eń úzdik teatrlardyń biri bolǵymyz keledi. La Scala teatrynyń basshylyǵymen jeke kezdeskende, men olarǵa bizdi qolymyzdan jetektep, jarqyn bolashaqqa jetelegen «anamyzdaı» bolýdy usyndym», deıdi.
Baǵasy 500 teńge men 30 000 teńgeniń aralyǵynda bolatyn «Don Kıhot» balettik spektakliniń bıletteri aǵymdaǵy jyldyń jeltoqsanynda satyla bastaıdy. Bıletterdi qoıylymǵa deıin bir jyl buryn satatyn úzdik teatrlardyń tájirıbesin «Astana Opera» teatry da óz tártibine engizedi. Úzilisti qosqanda 2 saǵat 40 mınýtqa sozylatyn spektakl klassıkalyq nusqada qoıylady.
