Aty ańyzǵa aınalǵan Kobı Braıantqa «Emmı» syılyǵy berildi
NUR-SULTAN. QazAqparat – Bıylǵy jyldyń qańtarynda qaza tapqan Ulttyq basketbolshylar qaýymdastyǵy (UBQ) klýby «Los-Andjeles Leıkerstiń» burynǵy qorǵaýshysy, Kobı Braıant «Emmı» syılyǵynyń laýreaty atandy. Bul týraly amerıkalyq televıdenıe akademııasy Twitter- de jazdy, dep habarlaıdy QazAqparat.
Marapat amerıkalyqqa Los-Andjelesti damytýǵa qosqan úlesi úshin berilip otyr.
Braıant 26 qańtarda jeke tikushaǵynyń apatqa ushyraýy saldarynan mert boldy. Ol 13 jasar qyzymen Djıannamen birge basketboldan jasóspirimder matchyna bara jatqan.
Borttaǵy toǵyz jolaýshynyń bári qaza tapty.
Braıant óziniń sporttyq jolynda «Los-Andjeles Leıkers» klýbynda óner kórsetti. Komandamen birge Ulttyq Basketbol qaýymdastyǵynyń bes ret chempıondyq tıtýlyn jeńip aldy. Ol eki dúrkin Olımpıada altynynyń ıegeri.
Aıta ketken jón, «Emmı» AQSh-ta televıdenıe salasyndaǵy basty marapat. Ony ár jyl saıyn Amerıkalyq televıdenıe akademııasy tapsyrady.