Aty ańyzǵa aınalǵan «Qara maıormen» qoshtasý rásimi Almatyda ótedi
ALMATY. QazAqparat - Aýǵan soǵysynyń ardageri, jaýyngerler arasynda «Qara maıor» atanǵan, QR Qarýly Kúshteriniń otstavkadaǵy polkovnıgi Borıs Kerimbaevty aqtyq saparǵa shyǵaryp salý rásimi 14 aqpanda Ofıtserler úıinde ótedi. Bul týraly Almaty ákimshiliginiń janyndaǵy Aýǵanstandaǵy soǵys ardagerleri jáne múgedekteri birlestikteriniń úılestirýshi keńes tóraǵasy Murat Ábdishúkirov habarlady.
«Marqumdy aqtyq saparǵa shyǵaryp salý sharasy Almatydaǵy ofıtserler úıinde 14 aqpan tańǵy 9.00-ǵa belgilendi. Odan soń 28 Panfılovshylar saıabaǵyndaǵy Aýǵan soǵysynda qaza bolǵandarǵa arnalǵan eskertkish mańynda qaraly mıtıng ótedi»,- dedi M.Ábdishúkirov.
Eske sala keteıik, aty ańyzǵa aınalǵan «Qara maıor» 71 jasyna qaraǵan shaǵynda kóz jumdy.
Borıs Tókenuly Kerimbaev 1948 jyly 12 qańtarda Almaty oblysynyń Jambyl aýdanynda dúnıege kelgen. 1970 jyly V. I. Lenın atyndaǵy Tashkent áskerı ýchılışesin támamdaǵan. 1980-1983 jyldary Aýǵan soǵysyna qatysyp, arnaıy tapsyrmalardy oryndaıtyn musylman batalonynyń komandıri boldy. Saýatty basshylyqtyń arqasynda batyr komandırdiń sarbazdary az shyǵynǵa ushyrap, kóbinese jeńiske jetip otyrǵan. Pandsher shatqalynda modjahedterdiń ataqty qolbasshysy Ahmad Shah Masýdtyń áskerimen soǵysqan.
Onyń erligi ańyzǵa aınalyp, «Qara maıor» degen laqap aty kúlli aımaqqa jaıylǵan. 1992 jyly densaýlyǵyna baılanysty polkovnık shenimen otstavkaǵa shyqty. Batyr týraly «Qara maıor» fılmi túsirilgen.
