Aty ańyzǵa aınalǵan «Qara maıor» 70 jasqa toldy
ALMATY. QazAqparat - Ataqty qara maıor, Aýǵan soǵysynyń ardageri Borıs Kerimbaev 70 jasqa tolǵan mereıtoıyn atap ótti, dep habarlaıdy QazAqparat tilshisi.
Aty ańyzǵa aınalǵan otstavkadaǵy polkovnıktiń mereıtoıy Almatydaǵy Ásker úıinde ótti.
Ataqty musylman batalonynyń komandırin quttyqtaýǵa Aýǵan soǵysynyń ardagerleri, jańa kýrsanttar, áskerı mamandar, Almaty oblysy men qalasy ákimshiliginiń ókilderi keldi.
«Men qolastymdaǵy ofıtserlerge alǵysymdy aıtamyn. Olar óz isiniń qas sheberleri. Al meniń mindetim olardy operatsııaǵa aparyp, aman-esen qaıtyp ákelý bolatyn. 2 jyl, 2 aı, 5 kúnde 45 adamymnan aıryldym. Soǵys bar jerde, ólim bar. Sondyqtan qaza bolǵandardy 1 mınýt únsizdikpen eske alýlaryńyzdy suraımyn», - dedi Borıs Kerimbaev.
QR Qorǵanys mınıstrligi atynan mereıtoıǵa oraı Borıs Kerimbaev «El qorǵany» medalimen marapattaldy.
Aıta keteıik, ataqty qara maıor Borıs Tókenuly Kerimbaev 1948 jyly 12 qańtarda Almaty oblysy Jambyl aýdanynda dúnıege kelgen. 1970 jyly V.I.Lenın atyndaǵy Tashkent áskerı ýchılışesin támamdaǵan. 1980-1983 jyldary Aýǵan soǵysyna qatysyp arnaıy tapsyrmalardy oryndaıtyn musylman batalonynyń komandıri boldy. Saýatty basshylyqtyń arqasynda batyr komandırdiń sarbazdary az shyǵynǵa ushyrap, kóbinese jeńiske jetip otyrǵanyn jurtshylyq jaqsy biledi.
«Musylman» batalonyn Aýǵan eline bara salǵanda Maımene aımaǵynda ornalasty. Negizinen tájik, qazaq, ózbek, qyrǵyz jigitterinen turǵan batalon ashyq alańdarda uryspen, barlaý jumystarymen aınalysty.
Al, 1982 jyly Keńes áskeri Panjer shatqalyn bosatyp ketkende, ony 1 aı boıy jaý qolyna bermeý Qara maıordyń batalonyna tapsyrylǵan.
Borıs Tókenuly nebári 500 adamymen osy úlken ańǵardy ustap qalýy tıis boldy. Sol kezdegi belgili Ahmad Shah Masýd qolbasshynyń áskerine toıtarys berý óte qıyn bolatyn.
Qara maıordyń komandasy 1 aı emes 1 jyl boıy Panjer shatqalyn ustap qalýmen qatar jaý áskerine oqtyn oqtyn soqqy berip turǵan.
Osy ýaqyt aralyǵynda onyń komandasynan 45 adam kóz jumǵan. Keıin Ahmed shah Masýd qara maıordy ustaǵan adamǵa 1 mln afganı tikken. Borıs Tókenulynyń batalony eń shyǵyn az batalon dep sanaldy.
Onyń erligi ańyzǵa aınalyp «Qara maıor» degen laqap aty kúlli aımaqqa jaıyldy. «Spetsnaz GRÝ SSSR» degen kitaptaǵy tizim boıynsha tórtinshi oryndy nyq ıelengen qazaq jigitin sol kezdegi keńestik saıasattyń ózi osylaı joǵary kóterip moıyndaǵan. 1992 jyly densaýlyǵyna baılanysty polkovnık shenimen otstavkaǵa shyqty. Batyr týraly «Qara maıor» fılmi túsirildi.
