«At ústindegi jubaılar» Prezıdentke tulpar syılaǵysy keledi

ASTANA. KAZINFORM — Qytaıdan Astanaǵa atpen jolǵa shyqqan erli-zaıypty elordaǵa aman-esen jetti. Kórshi elden kelgen baýyrlarymyzdy otandastarymyz dýmandatyp kútip aldy.

8 tamyz kúni Qytaıdyń Saýan aýdanynan jolǵa shyqqan Qýatbek pen Jaına 74 kúndi jolda ótkizgen. Halyq jupty áleýmettik jelide baqylap, asyǵa kútken edi. TikTok jelisinde ózderin «At ústindegi jubaılar» dep ataǵan jup osy sapar úshin 2500 shaqyrymdy artta qaldyrdy.

— Bul bizdiń tuńǵysh saparymyz emes. 2021 jyldan beri atqa minýdi qolǵa alǵanbyz. Oǵan sebep bolǵan — densaýlyq. Aýylda júrgen kezde bel omyrtqam zaqymdanyp, dárigerge kóringende «atqa minseń, jazylady» dedi. Aldymen aýyl, aýdan arasynda at minip júrdik. Keıin 4300 shaqyrym jerdegi Qytaıdyń astanasyna baryp qaıttyq. Ol kezde de týra osylaı 74 kúnde jetkenbiz. Bul joly da sol ýaqyt aralyǵynda jettik, — deıdi Qýatbek Núsiphanuly «Búgin LIVE» baǵdarlamasyna bergen suhbatynda.

Stýdııa qonaqtary sapardaǵy qyzyqtaryn bólisti.

— Jolda sharshaǵanymyz ras. Biraq halyqtyń qoldaýymen sharshaýymyz basylyp ketti. Jol boıy qyzyq boldy. Kóp adamdar Shashýbaıdan bastap «senderdi jaqsy qoldady, Saryarqadan beri qaraı tipti tamasha boldy» dep aıtyp jatyr. Arǵy jaǵynda, Almatydan óte sala aýyldardyń arasy alystaý boldy da, keıde kelesi aýylǵa jete almaı, dalaǵa qonǵan kezderimiz de boldy. Halyqtyń bári jaqsy qoldady. Sonyń ishinde Shashýbaı halqy Balqashtan at dúbirimen shyǵyp qarsy alǵannan keıin, qalǵan kisiler de solaı jalǵastyrdy, — deıdi olar.

Qytaıdan at terletip kele jatqan qandastardy qazaqstandyqtar da úılerine qudaıy qonaq etip, erekshe syı-qurmet kórsetipti.

— Biz bastapqyda «kóbinde dalada jatamyz ǵoı» dep shatyrymyz ben qajetti zattarymyzdy alyp alǵanbyz. Dese de, aýyldarǵa jetkende ondaǵy azamattar qudaıy qonaq qylyp kútip otyrdy. Kún sýytyp ketken kezderde aǵalarymyz otbasylyq kólikke deıin ornalastyryp, járdem etti. Ony orys aǵalarymyz aıdap, qıyn tustardan ótkizip jiberdi. Bul kólikti kóbine túnde demalýǵa paıdalandyq. Óıtkeni shatyrdyń ishi qatty sýyq boldy. Onyń ishinde tamaq istep, jatýǵa da bolady, — deıdi jubaılar.

Qýatbek pen Jaına Memleket basshysy Qasym-Jomart Toqaevpen júzdesip, Qytaıdan minip kelgen tulparlaryn syıǵa tartqysy keletinin jetkizdi.

— Bul — jol bolǵan soń, ózimizdiń josparymyz bolady. Biz Qytaıdan memleket attap kele jatyrmyz. Esik ashyp, arǵy jaqtan beri ótkende qalyń halyq qarsy alyp aldy. Eki eldiń dostyǵy jarasyp, osyndaı berekeli zamanda ómir súrip jatyrmyz. Ózimiz jolymyz aq bolsyn dep, aq júregimizben, aq nıetimizben arnaıy aq tulpardy tańdap alǵanbyz. Eki jaqtaǵy aǵaıyn-týystyń emin-erkin aralasýyna esik ashyp bergeni úshin halyq atynan, Qytaıdaǵy qandastarymyzdyń atynan raqmetimizdi bildirip, astymyzdaǵy minip kelgen aq tulparymyzdy Prezıdent atamyzǵa syıǵa tartqymyz keledi. Ózimen kezigip, Qytaı eliniń aq sálemin jetkizsek deımiz. Ázirge ótinishimizdi jazyp, atamyzdyń habaryn tosyp otyrmyz. Ol kisige de ońaı emes. Ózimizge bir otbasyny basqarýdyń ózi qıyn bolyp jatady. Bir memleketti osynshama dárejege jetkizip, júrgizý degen — ońaı sharýa emes. Sondyqtan shamamyz kelgenshe jumysymyzdy jasap jatyrmyz. Solaı halyqtyń jáne ózimizdiń armanymyzdy oryndap qaıtsaq pa deımiz, — deıdi stýdııa qonaqtary.