Atýǵa tyıym salýdyń nátıjesi: Jabaıy ańdar kóbeıdi - ShQO
ÓSKEMEN. QazAqparat - Sońǵy 5 jylda Shyǵys Qazaqstandaǵy terisi baǵaly ańdardyń sany 9000-ǵa kóbeıgen, dep habarlaıdy QazAqparat tilshisi.
2016 jyldan bastap Shyǵys Qazaqstan aýmaǵynda kóktem aılarynda ań atýǵa tyıym salynǵan bolatyn. Bul sharanyń qanshalyqty nátıje bergenin bilý úshin oblystyq tabıǵı resýrstar jáne tabıǵat paıdalanýdy retteý basqarmasy sanaq júrgizgen. Basqarma basshysynyń orynbasary Arman Esentaevtyń aıtýynsha, sanaq nátıjesi ańdardyń birshama óskenin baıqatyp otyr.
«2014 jylmen salystyrǵanda qońyr ańnyń sany 25759-dan 27401 basqa, aıýdyń sany 2199-dan 2295-ke, qabandar 1375-ten 1811-ge, taýeshki 960-tan 1030-ǵa kóbeıdi. Sonymen qatar, sańyraý qurlar 19,8 paıyzǵa artyp, sany 4246-ǵa jetti», - deıdi basqarma ókili.
Arman Esentaev kóktemde ań atýǵa tyıym salynýynyń arqasynda terisi baǵaly ańdardyń azaıýy toqtaǵanyn aıtady. Bulǵyn, kúzen, sileýsin, sýyr sııaqty terisi qymbat ańdardyń sany 2014 jyly 154872 bolsa, 2019 jyly 163874-ke jetken.
