Atty ekspedıtsııa kıeli jerlerdi aralaýda - Pavlodar oblysy
ASTANA. QazAqparat - «Alash» partııasynyń 100 jyldyǵyna oraı Baıanaýyl aýdanynyń azamattary «Ulylarǵa taǵzym - urpaqqa amanat» dep atalatyn atty ekspedıtsııa quryp, tarıhı oryndardy aralaýda.
Oblystyq máslıhat hatshysy Oral Sartaevtyń bastamasymen jáne «Nur Otan» partııasy aýdandyq fılıalynyń qoldaýymen qurylǵan ekspedıtsııalyq toptyń quramynda jeti adam bar. Olar óńirdegi kıeli jerlerdi, tarıhı eskerkishterdi jáne tanymal tulǵalardy týdyrǵan eldi mekenderdi atpen aralap, aýyl jastarymen kezdesýde, dep habarlaıdy pavlodarnews.kz .
«Maqsatymyz - shalǵaı aýyldardaǵy jastarmen kezdesip, jas urpaqty elin-jerin súııýge úgitteý, olardy at sportyna jáne ulttyq ónerge baýlý. Aldymen at basyn Leker qajy atyndaǵy aýylǵa buryp, aýyl turǵyndarymen jáne jastarymen kezdestik. Odan shyqqan soń Júsipbek Aımaýytov jáne Jumat Shanın aýyldaryna baryp, ulylardyń týǵan jerine taǵzym jasadyq. Aımaýytov aýylynda kókpardan jarys uıymdastyrylsa, keıingi eldi mekende asyq atý saıysyn ótkizdik. Sonymen qatar, osy aýyldardaǵy Kúreńbaı synshynyń zıraty, Qabylbek, Qaziret mekenindegi ulylardyń qorymyna, sondaı-aq, Maılytondardyń eski zıratyna, Nurǵalı mollanyń medresesi bolǵan orynǵa, usta, zerger, kenshi, geolog - Qosym Pishembaevtyń máńgilik jatqan jerine baryp duǵa oqyp, quran baǵyshtadyq», - deıdi oblystyq máslıhattyń depýtaty Oral Sartaev.
Salt attylardyń endigi baǵyty - Buqar Jyraý, Máshhúr Júsip kesenelerine toqtap, ulylardyń rýhyna duǵa baǵyshtaý. Odan keıin at basyn Jaıaý Musa, Qanysh Sátbaev jáne Sultanmahmut Toraıǵyrov aýyldary men Sháken Aımanov dúnıege kelgen Aımanbulaq jerine burý. Júrgen jerlerinde ártúrli kezdesýler, mádenı jáne sporttyq sharalar uıymdastyrýdy josparlap qoıǵan.
Saıahatshylardyń quramynda oblystyq jáne aýdandyq máslıhattyń depýtattary, óner jáne sport salasynyń mamandary bar.
Aıta keteıik, «Týǵan jer» baǵdarlamasyn iske asyrýǵa oraı qurylǵan aımaqtyq jumys tobynyń alǵashqy otyrysynda depýtattar men kásipkerlerdiń, ózge de laýazymdy qyzmet ıeleriniń oqyǵan mektepteri anyqtaý jumystary qolǵa alynǵan. Keıin azamattar ózi bilim alǵan mekemege qajetti materıaldyq jaǵdaılar jasap, ózge de kómekter kórsete alady.
