Attraktsıonǵa aıaǵy qysylyp qalǵan: Qyzylordadaǵy saıabaq ýaqytsha jabyldy
QYZYLORDA. KAZINFORM — Qyzylorda qalasyndaǵy jasóspirimniń aıaǵy attraktsıonǵa qysylyp qalǵan jaǵdaıǵa qatysty tyń málimet paıda boldy.
Kazinform tilshisine qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi habarlaǵandaı, oqys oqıǵa 14 maýsym kúni tún jarymynda bolǵan.
— Oblystyq tótenshe jaǵdaılar departamentiniń qutqarý jasaǵy gıdravlıkalyq quraldardyń kómegimen der kezinde zardap shegýshiniń attraktsıonnyń relstik qurylymynda qysylyp qalǵan eki aıaǵyn bosatty. Odan keıin oblystyq kópbeıindi medıtsınalyq ortalyqqa jetkizildi, — delingen habarlamada.
18 jastaǵy bozbala demalys ornynyń qyzmetkeri eken. Aýrýhanada eki aıaǵyna ampýtatsııa jasaldy.
Qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi saıabaqtaǵy attraktsıondardyń tirkelmegenin málimdedi.
— Bólimge qalalyq mádenıet parki men prezıdent saıabaǵyndaǵy attraktsıondar ǵana tirkelgen. Qalǵany jeke kásipkerlik nysandary bolǵandyqtan olar ózderi ótinish berip, tirkelýi qajet. Degenmen, «Araı» saıabaǵy tarapynan attraktsıondardy esepke alý týraly usynys berilmegen. Oblystyq memlekettik sáýlet-qurylys baqylaýy basqarmasy men qala ákimdiginiń ókilderi ótken jyly 21 mamyrda jáne 20 tamyzda jańadan ornatylǵan attraktsıondar men balalarǵa arnalǵan oıyn alańdaryn standart talaptaryna sáıkes esepke qoıý qajettigi týraly eskertý jasaǵan, — delingen habarlamada.
Saıabaq ákimshiliginiń eki eskertýdi elemegeni sońynda opyq jegizdi. Búginde eńbekti qorǵaý qaǵıdalaryn buzý deregi boıynsha tergeý jalǵasyp jatyr. Al demalys ornynyń esigi tergeý aıaqtalǵansha jabyq.
Eske salaıyq, dárigerler buǵan deıin emdelýshiniń densaýlyq jaǵdaıy óte aýyr ekenin aıtqan bolatyn.
