Attraktsıondaǵy ólim: kompanııanyń barlyq qyzmetkerleri beıresmı jumys istegen
QARAǴANDY. QazAqparat – Qaraǵandyda bıikten sekirýdi uıymdastyrǵan fırmanyń birde-bir qyzmetkeri resmı túrde jumys istemegen. Bul týraly 34 jastaǵy Evgenııa Leontevanyń qaıtys bolýna qatysty qylmystyq is boıynsha sottyń kezekti otyrysynda belgili boldy, dep habarlaıdy QazAqparat tilshisi.
Qaraǵandyda Qazybek bı aýdandyq sotynda 34 jastaǵy Evgenııa Leontevanyń qaza bolǵany týraly is boıynsha sot otyrysy jalǵasýda. Іs materıaldarynan belgili bolǵandaı, «Fly Qazaqstan» fırmasynyń dırektory Ilıa Ilıchev óz JShS-in 2021 jyldyń jazynda tirkegen. Kompanııa bıiktikten sekirýdi júzege asyrǵanyna qaramastan, barlyq qyzmetkerler onda beıresmı jumys istegen.
Qaıǵyly oqıǵa kezinde kompanııanyń ıesi Ilıa Ilıchev Reseıde bolǵan. Ol kezde ol anasyn jerleýdi uıymdastyrǵanyn jetkizgen. Alaıda osydan keıin de «Fly Qazaqstan» dırektory Qazaqstan aýmaǵyna oralmaǵan. Qzargi tańda Qazaqstan polıtsııasy oǵan halyqaralyq izdeý jarııalady.
Búgingi sot otyrysynda aıyptalýshy Aleksandr Mýznıkas pen fırmanyń taǵy bir qyzmetkeri «Fly Qazaqstanda» beıresmı jumys istegenderin moıyndady. Olar jalaqysyn kartaǵa aýdarý arqyly nemese Ekaterına Savıtskaıadan alyp otyrǵandaryn jetkizdi.
Alaıda ákimshi qyzmetin atqarǵan Ekaterına Savıtskaıa bul kompanııada jumys istegenin moıyndamaı otyr. Ol Ilıa Ilıchevpen dostyq qarym-qatynasta bolǵandyqtan, tek áleýmettik jelilerdi júrgizýge kómekteskenin jáne ol úshin aqsha almaǵanyn aıtady.
Sondaı-aq, otyrys barysynda nusqaýshylardyń arnaıy daıyndyǵy jáne oqytý týraly tıisti sertıfıkattary bolmaǵany belgili boldy. Búgingi protsesste 5 tehnık-nusqaýshylardyń biri Lev Glýhovskıı jaýap berdi.
Onyń aıtýynsha, ol «Fly Qazaqstanǵa» qyzmetkerlerdi qabyldaý týraly habarlandyrý boıynsha ornalasqan. Ilıa Ilıchevte eki aılyq taǵylymdamadan ótkenin aıtady. Biraq arnaıy bilim alǵany týraly eshqandaı qujatty qolyna almaǵan.
Sekirý kezinde klıentpen 3 nusqaýshy jumys isteıdi: joǵaryda bireýi jáne tómende ekeýi. Joǵarydaǵy nusqaýshynyń mindeti klıentterdi sekirýge daıyndaý, arnaıy belbeýlerdi taǵý, aýyzsha nusqaý berý jáne sıgnaldy kútkennen keıin adamdardy sekirýge jiberý bolǵan.
Jerdegi nusqaýshylardyń da óz mindetteri bar. Olardyń biri tejegish júıesin aǵashqa bekitip, klıenttiń jaıly túsýin qadaǵalaý bolsa, ekinshisi joǵarydan sekirgen adamdardy qarsy alyp, olardyń belbeýlerin sheshýi kerek. Sol kúni Lev Glýhovskıı tejeý júıesin bekitýmen aınalysqan.
Glýhovskııdiń aıtýynsha, sol kúni Aleksandr Mýznıkas Evgenııa Leontevanyń salmaǵyn habarlamaǵan jáne onyń sıgnalyn kútpesten klıentke sekirýge ruqsat bergen. Aleksandr Mýznıkas óz kezeginde Glýhovskıı jumys ornyn tastap ketkenin, sondyqtan kabeldi baılap úlgermegenin aıtty.
Eske sala keteıik, qaıǵyly oqıǵa ótken jyldyń 10 qazanynda oryn alǵan bolatyn.
Sottalýshy oryndyǵynda roýp-djampıng nusqaýshysy otyr. Oǵan Qylmystyq kodekstiń 306-babynyń 3-bóligi (Abaısyzda adam ólimine ákep soqqan, tutynýshylardyń ómiri men densaýlyǵy qaýipsizdiginiń talaptaryna saı kelmeıtin jumystardy oryndaý ne qyzmetter kórsetý) boıynsha aıyp taǵyldy.
Bul is boıynsha kelesi otyrys 5 mamyrda ótedi.
