Attraktsıondaǵy áıeldiń ólimi: Depýtattar sheneýnikterdi jazalaýdy surady
NUR-SULTAN. QazAqparat – Parlament Májilisiniń jalpy otyrysynda depýtat Artýr Platonov barlyq deńgeıdegi attraktsıondarǵa júıeli qadaǵalaýdy qamtamasyz etýdi surady, dep habarlaıdy QazAqparat tilshisi.
«Qaraǵandyda eki balanyń anasy «tarzankadan» sekirip kóz jumdy. Keshe buqaralyq aqparat quraldarynda attraktsıon nusqaýshysy ustalǵany habarlandy. «Nur Otan» fraktsııasynyń depýtattary demalys ári oıyn-saýyq saıabaqtarynyń, attraktsıondardyń tehnıkalyq jaǵdaıyna, balalar alańdary qyzmetin baqylaý máseleleri boıynsha júıeli sharalar qabyldaý úshin buǵan deıin birneshe ret Úkimetke úndeý jasaǵan edi», - dedi A. Platonov Premer-Mınıstrdiń orynbasary Romana Sklıardyń atyna joldaǵan saýalynda.
Osy oraıda ol qaıǵyly oqıǵalardy tekserý kezinde atalǵan jabdyqtardy ornatýda erejeni óreskel buzý faktileri anyqtalyp otyratynyn aıtty. Óz kezeginde jergilikti atqarýshy organdar atalǵan jabdyqtardy ornatýǵa ruqsat bermegenin nemese basqa da túsiniktemelerdi aıtyp aqtalyp jatady.
Depýtattyń aıtýynsha, attraktsıondardy maýsym aldynda jáne josparly tekserýdi júrgizý tártibiniń esebi men baqylaýy bolmaı tur.
«Attraktsıondar esepke qoıylýy tıis. Alaıda el boıynsha qansha nysan esepke qoıylmaǵan? Reglamentte tapsyrylǵandaı, qurylǵan komıssııalar tarapynan qanshasy tekserildi? Attraktsıondardyń barshasyna qajetti aktiler jasaldy ma? Qurylǵan normatıvtik bazaǵa qaramastan, eldegi jaǵdaı ózgere qoımady. Osyndaı nysandarda balalar men eresekter qaıǵyly jaǵdaıǵa tap bolyp jatyr, ıaǵnı bul turǵyda jaýapkershiliktiń joq ekenin kórip turmyz», - dedi depýtat.
Bul turǵyda depýtattar kelesi usynystardy aıtty:
1. Barlyq deńgeıde júıeli baqylaýdy qamtamasyz etý myńyzdy. Bul rette balalar men ereksekterdiń qaýipsizdigine, jabdyqtyń sapasyna jekeleı jaýapkershilikti bekitý;
2. Osy salada baqylaýǵa jaýap beretin sheneýnikterdi jazaǵa tartý;
3. Ár óńir boıynsha attraktsıondardy lıtsenzııalaý týraly málimetterdi berip, ákimdik aıqyndaǵan naqty laýazym ıelerin kórsetý.
Eske sala keteıik, jaqynda Qaraǵandyda 25 metr bıiktikten «tarzankadan» sekirgen áıel kóz jumdy.
12 qazan kúni Qaraǵandyda qonaqúıdiń shatyryna ornatylǵan attraktsıonda áıeldiń qaza bolý isine baılanysty kúdikti ustaldy.
