Attestattaý nátıjesinde QR quqyq qorǵaý organdary joǵarǵy basshy quramynyń úshten bir bóligi jańarady
ASTANA. 22 maýsym. QazAqparat - Búgin Aqordada quqyq qorǵaý organdarynyń qyzmetkerlerin kezekten tys attestattaý máselesi jóninde brıfıng ótti, dep habarlady QR Prezıdentiniń baspasóz qyzmeti.
Prezıdent Ákimshiligi quqyq qorǵaý júıesi bóliminiń meńgerýshisi Alık Shpekbaev Memleket basshysynyń Jarlyǵyna sáıkes quqyq qorǵaý organdarynyń qyzmetkerlerin kezekten tys attestattaý ótkizilgenin málimdedi. Halyqaralyq tájirıbeni taldaýdy eskere otyryp, attestattaýdyń úsh deńgeıli shemasy anyqtaldy.
Kezekten tys attestattaýdyń negizgi mindetteri quqyq qorǵaý organdary qyzmetkerleriniń kásibı, áskerı jáne dene shynyqtyrý daıyndyǵynyń deńgeıin tekserý, óz qataryn quzyretti emes qyzmetkerlerden jáne moraldyq-adamgershilik sıpaty tómen, sybaılas jemqorlyq kórinisterine jáne ózge de teris qylyqtarǵa beıim adamdardan tazartý bolyp tabylady.
Qazaqstan Respýblıkasynyń Prezıdenti janyndaǵy Joǵary attestattaý komıssııasynyń (JAK) 9 otyrysy ótti, sonyń sheńberinde 349 qyzmetkermen áńgimelesý ótti, olardyń ishinen 280-i (80 %) attestattaýdan ótti, onyń ishinde 24 adamdy kadrlyq rezervke qoıýǵa usynym berildi. Al 69 (20 %) laýazymdy tulǵa attestattaýdan ótken joq, olardyń ishinen 29 adam jumystan bosatýǵa, 28-i laýazymyn tómendetýge, 12-si basqa qyzmetke aýystyrýǵa usynyldy.
Árbir attestattalatyn adam boıynsha kadrlyq sheshim áńgimelesý nátıjeleri boıynsha derbes qabyldandy, onyń barysynda qyzmet ótkerý, testileýden ótý, kásibı jaramdylyqqa arnalǵan normatıvterdi tapsyrý nátıjeleri jáne arnaıy tekserý materıaldary taldandy.
JAQ qoıatyn joǵary talaptardy eskergen 26 qyzmetker kezekten tys attestattaýdan ótýden bas tartty, atqaryp otyrǵan laýazymdarynan bosatý jáne quqyq qorǵaý organdarynan qyzmetten bosatý týraly raporttarmen júgindi. Budan basqa, atqaratyn laýazymyna sáıkes keledi dep tanylǵan 13 qyzmetker JAK-tiń sheshimimen rotatsııalaýǵa, 6 adam shekti jas mólsherine jetýine baılanysty jumystan bosatýǵa usynyldy.
Ótkizilgen attestattaýdyń nátıjesinde quqyq qorǵaý organdary joǵary basshy quramynyń úshten bir bóligi jańarady.
JAK jumysynyń nátıjeleri boıynsha Memleket basshysyna quqyq qorǵaý organdarynyń qyzmetkerlerin materıaldyq jáne áleýmettik qamtamasyz etýdi arttyrý, sonymen qatar quqyq qorǵaý organdarynda zańnamany jáne kadr saıasatyn jetildirý týraly usynystar engizildi.
