Attestattaý nátıjesinde qarjy polıtsııasy organdarynyń joǵary basshylyq quramy 85 paıyzǵa jańardy - R. Túsipbekov
ASTANA. 19 aqpan. QazAqparat - Kezekten tys attestattaý nátıjesinde qarjy polıtsııasy organdarynyń joǵary basshylyq quramy 85 paıyzǵa jańardy. «Kazahstanskaıa pravda» gazetine bergen suhbatynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Rashıd Túsipbekov osylaı málim etti.
«Shyndyǵynda da kezekten tys attestattaý bizdiń qyzmetkerlerdi kásibı, moraldyq jaramdylyq turǵysynan tekseretin naǵyz synaqtyń ózi boldy. Al attestattaý komıssııasynyń sheshimimen 528 qyzmetker óz laýazymyna saı emes dep tanylǵan bolatyn. Bul jalpy qyzmetkerlerdiń 17,4 paıyzyn quraıdy. Budan bólek, óziniń atestattaýǵa daıarsyzdyǵyn, quzyretsizdigin sezingender álgi shara bastalmaı turyp-aq ony ótýden bas tartyp, jumystan erikterimen ketý týraly ótinishterin tapsyrǵan bolatyn. Al kezekten tys attestattaý nátıjesinde qarjy polıtsııasy organdary joǵary basshylyq quramynyń 85 paıyzy, ortańǵy basqarýshy quramynyń 27 paıyzy, qatardaǵy qyzmetkerlerdiń 6,5 paıyzy jańardy. Attestattaý nátıjesinde biz bir jaǵynan jaýapsyz, óz isine yjdaǵatsyz qaraıtyn qyzmetkerlerden qutylsaq, ekinshi jaǵynan bosaǵan basshylyq laýazymdarǵa ornalastyrýǵa múmkin bolatyn bilikti mamandardy taýyp, olardy kadrlyq rezervke aldyq», - deıdi R. Túsipbekov. Onyń aıtýynsha, jalpy attestattaýdan keıin qarjy polıtsııasynyń 2 508 qyzmetkeri nemese 82 paıyzy óz qyzmetterine laıyq dep tanyldy. Budan bólek, olardyń 267-i nemese 11 paıyzy kadrlyq rezervke esepke alyndy.
«Solardyń jartysyna jýyǵy qazirdiń ózinde joǵary laýazymdarǵa taǵaıyndalyp otyr», - deıdi tóraǵa jýrnalıske bergen suhbatynda.
