Attestattaý komıssııasynyń otyrysyna eki ret kelmeı qalǵan quqyq qorǵaý qyzmetkeri qyzmetinen bosatylady

Bul týraly búgin quqyq qorǵaý organy qyzmetkerlerin kezekten tys attestattaý sharasyna baılanysty Astanada ótken semınar-trenıng barysynda Astana qalalyq Іshki ister departamenti kadrlyq jumys basqarmasy bastyǵynyń orynbasary Alpysbaı Tashmaǵambetov málim etti.

Onyń sózine qaraǵanda, mundaı shara quqyq qorǵaý salasynda alǵash ret uıymdastyrylyp otyr. Ony uıymdastyrýdaǵy maqsat - zamanǵa saı quqyq qorǵaý júıesin qalyptastyrýǵa qajetti kadrlyq áleýetti jasaqtaý.

«Osy rette attestattaý sharasy quqyq qorǵaý salasyn óz qyzmetine salǵyrt qaraıtyn azamattardan tazartyp, bul salada óz qyzmetin minsiz atqaratyn bilikti mamandardy qaldyrýǵa yqpal etedi degen úmit bar. Attestattaýdan ótý úshin tártip saqshylary Qazaqstan Respýblıkasynyń zańnamalaryn bilý deńgeıine qatysty kompıýterlik testileýden ótedi. Sondaı-aq onda qyzmetkerdiń logıkalyq oılaý júıesi de synǵa túsedi. Buǵan qosa tártip saqshylarynyń áskerı jáne dene kúshine baılanysty daıyndyq normatıvterin qanshalyqty oryndaı alatyny belgili bolady»,-dedi basqarma bastyǵynyń orynbasary.

Onyń sózinshe, attestattaý sharasy barysynda quqyq qorǵaý qyzmetkeriniń psıhologııalyq jaǵynan turaqtylyǵy da tekseriledi. Polıtseıler tabeldik qarýdyń taktıkalyq jáne tehnıkalyq erekshelikterin bilýleri jáne qarýdy minsiz qoldana alýy qajet.  

«Qyzmetkerlerdiń normatıvti aktilerdi bilý deńgeıi boıynsha belgili bir shek qoıylǵan. Tómengi, ıaǵnı qatardaǵy qyzmetkerler ár synaqtyń keminde 50 paıyzyna jaýap berýi tıis. Al orta jáne joǵary deńgeıdegi qyzmetkerler 60 paıyzdyq mejeden joǵary upaı jınaıdy. Bul rette attestattaýdan ótetin azamat synaqqa engiziletin saýaldar tobynyń tek bireýinen ótpeı qalatyn bolsa, attestattaý sharasynyń barlyq talaptaryn oryndamaǵan bolyp shyǵady. Testileý sharasyna 60 mınýt ýaqyt beriledi»,-dedi A.Tashmaǵambetov.

Onyń málimetterdi boıynsha, attestattaý talaptaryn oryndaı almaǵan qyzmetkerlerge ekinshi qaıtara synaqtan ótýge ruqsat etiledi. Ekinshi synaqty 10 kúnnen keıin tapsyra berýge bolady. Al testileýden óte almaǵan nemese normatıvterdi ekinshi márte tapsyra almaǵan qyzmetkerlerge qatysty attestattaý komıssııasy «óz qyzmetine saı emes, sondyqtan qyzmetinen tómendetilsin», «óz qyzmetine saı emes, sol sebepti ózge qyzmetke aýystyrylsyn» jáne «óz qyzmetine saı emes, sondyqtan quqyq qorǵaý organdarynan bosatylsyn» degen syńaıdaǵy úsh sheshimniń birin qabyldaıdy.

«Attestattaý komıssııasynyń otyrysyna eki márte kelmaı qalǵan qyzmetkerler jumystan bosatylady. Quqyq qorǵaý salasynda qyzmet etip júrgen, biraq qazirgi ýaqytta júktiligine baılanysty demalysta júrgen qyzmetkerler attestattaýǵa jatpaıdy»,-dedi basqarma bastyǵynyń orynbasary.